Pakistandan Şimali Kipr barədə qəti bəyanat: Türkiyənin yanındayıq
Pakistanın Baş naziri Şahbaz Şərif Şimali Kipr Türk Respublikası məsələsində ölkəsinin Türkiyəyə dəstəyinin davam edəcəyini bəyan edib.
Crossmedia.az bu barədə xarici mediaya istinadən xəbər verir.
O bildirib ki, İslamabad Ankara ilə bağlı bu mövqeyini uzun illərdir ardıcıl şəkildə qoruyur və bundan sonra da Şimali Kipr Türk Respublikası məsələsində Türkiyəni qətiyyətlə dəstəkləməyə davam edəcək.
Baş nazir eyni zamanda Türkiyəyə Cammu və Kəşmir xalqına, eləcə də onların qanuni öz müqəddəratını təyin etmək hüququna göstərdiyi prinsipial və dəyişməz dəstəyə görə dərin minnətdarlığını ifadə edib.
Çıxışı zamanı Şahbaz Şərif türk dilində də müraciət edərək, “Yaşasın Pakistan və Türkiyə arasında qardaşlıq və dostluq!” sözlərini səsləndirib.
Pakistan Baş nazirinin açıqlamaları iki ölkə arasında strateji tərəfdaşlıq və qarşılıqlı siyasi dəstəyin davam etdiyini bir daha nümayiş etdirib.
20:10 04.07.2026
Oxunuş sayı: 52
