Azərbaycanın BMT sülhməramlı missiyalarında iştirakı genişləndirir
Azərbaycan uzun illərdir beynəlxalq sülh və təhlükəsizliyin qorunmasına töhfə verən ölkələr sırasında yer alır. Ölkəmizin hərbçiləri BMT-nin müxtəlif sülhməramlı missiyalarında uğurla xidmət edib və bu fəaliyyət beynəlxalq səviyyədə yüksək qiymətləndirilib. Hazırda da Azərbaycan hərbçiləri Cənubi Sudanda sülhyaratma missiyasında iştirakını davam etdirir. Mütəxəssislər hesab edirlər ki, bu missiyalarda iştirak həm ordunun peşəkarlığının artırılması, həm də Azərbaycanın beynəlxalq nüfuzunun möhkəmləndirilməsi baxımından mühüm əhəmiyyət daşıyır.
Hərbi ekspert Ədalət Verdiyev Crossmedia.az-a açıqlamasında bildirib ki, Azərbaycan artıq 27 ildir beynəlxalq sülhün və təhlükəsizliyin qorunmasına mühüm töhfələr verir. Onun sözlərinə görə, Azərbaycan hərbçiləri Kosovoda, Əfqanıstanda və İraqda BMT-nin sülhyaratma missiyalarında uğurla iştirak edib, hazırda isə Cənubi Sudandakı missiyada fəaliyyətlərini davam etdirirlər: "Beynəlxalq əməliyyatlarda iştirak ordunun döyüş hazırlığının yüksəlməsinə və dövlətin beynəlxalq nüfuzunun artmasına müsbət təsir göstərir. Onun sözlərinə görə, Azərbaycan BMT-nin hazırda davam edən müxtəlif sülhməramlı missiyalarında da iştirak etməklə həm təcrübəsini zənginləşdirə, həm də beynəlxalq arenada mövqeyini daha da gücləndirə bilər".
Ədalət Verdiyev qeyd edib ki, belə missiyalar müəyyən risklər daşısa da, indiyədək Azərbaycan sülhməramlı kontingenti bu risklərin minimuma endirilməsi istiqamətində uğurlu fəaliyyət göstərib: "BMT-nin sülhməramlı missiyalarında Azərbaycan hərbçilərinin iştirakının genişlənməsi yalnız müsbət qiymətləndirilə bilər".
Zeynəb Həsən
20:55 04.07.2026
Oxunuş sayı: 67
