Gündəm,Mədəniyyət
Azərbaycan Milli Xalça Muzeyi "Zamanın naxışları" moda nümayişinə ev sahibliyi etdi
Azərbaycan Milli Xalça Muzeyində “Xalça Muzeyi Fashion Show: Zamanın naxışları” adlı moda nümayişi keçirilib.
Crossmedia.az xəbər verir ki, tədbirdə Alyona Əliyeva da iştirak edib.
Tədbirin açılışını Azərbaycan Milli Xalça Muzeyinin direktoru Əminə Məlikova edib. O, çıxışında layihənin Azərbaycan xalçaçılıq sənətinin zəngin irsinin müasir moda dili ilə təqdim olunması, milli-mədəni dəyərlərin qorunması və gələcək nəsillərə ötürülməsi baxımından mühüm əhəmiyyət daşıdığını bildirib.
Daha sonra söz Azərbaycan Respublikasının mədəniyyət nazirinin müavini Səadət Yusifovaya verilib. Nazir müavini belə layihələrin milli irsin təbliği, yaradıcı sənayenin inkişafı və ənənəvi sənət nümunələrinin müasir baxışla təqdim olunması istiqamətində mühüm rol oynadığını vurğulayıb.
Moda nümayişi çərçivəsində ölkənin 14 peşəkar modelyer-dizayneri – Fəxriyyə Xələfova, Gülnarə Xəlilova, Leyla Əhmədova, Yeganə Sadıqova, Mətanət Bayramova, Xəyalə Məsumova, Səbinə Zülalova, Leyla Babazadə, Günay Əliyeva, Şəbnəm Bayramova, Acəmi Azər, Kübra Nuriyeva, Afaq İsmayılzadə və Xəyalə Bayramovanın hazırladığı ümumilikdə 116 geyim nümayiş olunub.
Kolleksiyalarda xalçaçılıq sənətinin ənənələri, milli ornamentlər, qədim simvollar və rəng harmoniyası müasir estetik baxış prizmasından təqdim edilib. Layihənin əsas ilham mənbələrindən biri bu il anadan olmasının 120 illiyi qeyd olunan görkəmli alim və xalçaçı-rəssam Lətif Kərimovun zəngin yaradıcılığı olub. Dizaynerlər onun yaratdığı xalça kompozisiyalarını, naxışlarını və bədii-estetik prinsiplərini müasir geyim kolleksiyalarında yaradıcı şəkildə əks etdiriblər.
Tədbir Azərbaycan xalçaçılıq sənətinin təbliği, milli-mədəni irsin qorunması və onun müasir təqdimat formaları vasitəsilə daha geniş auditoriyaya çatdırılması məqsədinə xidmət edib.
Nigar Xəlilli
09:30 02.07.2026
Oxunuş sayı: 68
