“Monomerlər və neft kimyasının müasir problemləri” - beynəlxalq elmi konfrans
Elm və Ali Təhsil üzrə Dövlət Agentliyi və Elm və Təhsil Nazirliyinin akademik Y.Məmmədəliyev adına Neft-Kimya Prosesləri İnstitutunun birgə təşkilatçılığı ilə akademik Soltan Mehdiyevin anadan olmasının 110 illik yubileyinə həsr edilmiş “Monomerlər və neft kimyasının müasir problemləri” mövzusunda beynəlxalq elmi konfrans keçirilib.
İnstitutdan bildirilib ki, konfransın keçirilməsində əsas məqsəd görkəmli alimin elmin inkişafındakı rolunun bir daha işıqlandırılması, bu sahədə son nailiyyətlərin müzakirəsi, yeni istiqamətlərin müəyyənləşdirilməsi olub.
Konfransın elmi proqramında “Monomerlər kimyası və neft-kimya sintezi”, “Alitsiklik karbohidrogenlər və onların funksional törəmələri”, “Monomerlərin alınmasında katalizatorlar və onların tətbiqi”, “Alitsiklik və aromatik oksigenli birləşmələr və texnoloji proseslər” və “Üzvi sintez və neft kimyasının ekoloji problemləri” bölmələr üzrə plenar, şifahi və stend məruzələri dinlənilib. İki gün davam etmiş konfransın təşkilat komitəsinə ümumilikdə 121 material daxil olub.
Tədbiri açan Neft-Kimya Prosesləri İnstitutunun baş direktoru akademik Vaqif Abbasov akademik Soltan Mehdiyevin Azərbaycan kimya elminin inkişafındakı xidmətlərindən, bu sahənin inkişafına verdiyi töhfələrdən danışıb.
AMEA-nın vitse-prezidenti, Kataliz və Qeyri-üzvi Kimya İnstitutunun baş direktoru, akademik Dilqəm Tağıyev, Bakı Dövlət Universitetinin Üzvi kimya kafedrasının müdiri akademik Abel Məhərrəmov və başqaları görkəmli alim haqqında xatirələrini bölüşüblər.
Daha sonra konfransda plenar məruzələr dinlənilib.
23:35 20.12.2024
Oxunuş sayı: 17831
