ADA Universitetinin və İqtisadiyyat Nazirliyinin birgə “Liderlik bacarıqlarının inkişafı” proqramı yekunlaşıb
ADA Universitetinin İxtisasartırma Proqramı İqtisadiyyat Nazirliyinin Təlim Tədris Mərkəzi ilə birgə təşkil etdiyi “Liderlik bacarıqlarının inkişafı” proqramını başa vurub. Bu barədə ADA-dan məlumat verilib.
Bu münasibətlə ADA Universitetində bağlanış mərasimi keçirilib, iştirakçılara sertifikatları təqdim edilib.
Mərasimin ilk çıxışçısı, ADA Universitetinin akademik işlər üzrə prorektorunun müşaviri Aygün Hacıyeva qeyd edib ki, peşəkar mühitdə durmadan dəyişən yeni tendensiyalar, idarəetmədə tətbiq edilən innovasiyalar fonunda dövlət qulluqçularının daimi inkişafının təmin edilməsi, onların liderlik bacarıqlarının inkişafı əhəmiyyətlidir. Bunları nəzərə alan İxtisasartırma Proqramı 30-dək dövlət qurumunu təmsil edən 3000-dən çox dövlət qulluqçusunun iştirakı ilə müxtəlif proqramlar təşkil edib və bu proqramlar özlüyündə qurumlararası bilik, bacarıq mübadiləsi platforması rolunu oynayıb.
İqtisadiyyat Nazirliyinin Aparat rəhbərinin müavini Amil Əlili çıxış edərək kadr potensialının inkişaf etdirilməsinin əhəmiyyətini vurğulayıb. Bu istiqamətdə təşkil edilən proqramların yüksək rəqabətli insan kapitalının formalaşdırılmasındakı rolu qeyd edilib. A.Əlili proqramın səmərəli təşkilinə görə ADA Universitetinə təşəkkürünü bildirib.
Proqram iştirakçıları təlimlərin idarəetmə, liderlik, komanda quruculuğu və nitq bacarıqlarının təkmilləşdirilməsi baxımından faydalı olduğunu qeyd ediblər.
Xatırladaq ki, iki ay davam edən proqram 7 moduldan ibarət olub. Həmin modullar liderlik bacarıqları, etiket və protokol qaydaları, habelə komandanın uğurlu idarə edilməsi və motivasiya kimi mövzuları əhatə edib. Strategiyanın planlaşdırılması və icrası, dəyişikliklərin idarə edilməsi, danışıqların aparılması, nitq bacarıqları və liderlik ünsiyyəti məsələləri də modulların mövzuları sırasında yer alıb.
Dövlət, özəl və akademik sektorun ekspertləri tərəfindən tədris edilən və interaktiv formatda keçirilən proqramda iştirakçılar təqdimatlar, “beyin fırtınası” və real hadisə analizi kimi sessiyalarda iştirak ediblər.
21:34 20.12.2024
Oxunuş sayı: 8847
