Bəhruz Əzimov: Təhsil Tələbə Kreditindən indiyədək 45 min 426 nəfər faydalanıb
Təhsil Tələbə Krediti Fondu (TTKF) fəaliyyətə başladığı gündən indiyədək 45 min 426 tələbə təhsil kreditindən yararlanıb.
Bu barədə TTKF-nin sədri vəzifəsini müvəqqəti icra edən Bəhruz Əzimov Fondun 3 illik fəaliyyətinə dair keçirilən brifinqdə məlumat verib. Onun sözlərinə görə, kredit alan tələbələrin böyük əksəriyyəti bakalavriat səviyyəsində təhsil alanlardır. Statistikaya əsasən, 31 min 805 nəfər bakalavriat, 11 min 165 nəfər magistratura, 2297 nəfər orta ixtisas, 159 nəfər isə texniki peşə təhsili üzrə kreditlərdən faydalanıb.
Əzimov həmçinin qeyd edib ki, təhsil kreditindən istifadə edənlərin 39 faizi kişilər, 61 faizi isə qadınlardır.
Təhsil Tələbə Krediti Fondu ölkədə təhsilin əlçatanlığını artırmaq məqsədilə 3 il əvvəl təsis edilib və bu müddət ərzində minlərlə tələbənin təhsilini maliyyələşdirməyə dəstək olub.
Bu uğurlu göstəricilər, təhsil sahəsində davamlı inkişafın təmin olunmasına yönəlmiş dövlət strategiyasının uğurla həyata keçirildiyini nümayiş etdirir.
Maral Şahverdili
08:01 20.12.2024
Oxunuş sayı: 5300
