"Məqsədimiz Azərbaycan səhiyyəsini daha yüksək səviyyəyə çatdırmaqdır" - Vüqar Qurbanov
Səhiyyə sahəsində idarəçiliyin inkişafı məqsədilə təşkil olunan zirvə toplantısında dövlət və özəl tibb müəssisələrinin rəhbərləri arasında geniş fikir mübadiləsi aparılıb. Tədbirin əsas məqsədi səhiyyə sahəsindəki idarəetmə təcrübəsini təkmilləşdirmək, yeni yanaşmaları müzakirə etmək və həm dövlət, həm də özəl tibb müəssisələrində həyata keçirilən yeniliklər haqqında məlumat paylaşımı təmin etmək olub.
TƏBİB-in İcraçı direktoru Vüqar Qurbanov tədbir haqqında danışarkən bildirib ki, səhiyyə sistemində mövcud problemlər müzakirə edilərək, onların həlli istiqamətində birgə addımlar atılacaq. "Həm dövlət tibb müəssisələrində, həm də özəl sektorda həyata keçirilən dəyişikliklər və yeniliklər diqqət mərkəzindədir. Məqsədimiz Azərbaycanın səhiyyə sistemini daha yüksək səviyyəyə çatdırmaq və onu beynəlxalq arenada nümunəvi sistemə çevirməkdir. Bu istiqamətdə ölkə başçısının və hörmətli birinci xanım Mehriban Əliyevanın rəhbərliyi ilə mühüm islahatlar həyata keçirilir," – deyə o qeyd edib.
O vurğulayıb ki, səhiyyə sistemi daim yeniliklərə ehtiyac duyur və bu yeniliklər mütəmadi olaraq ölkəmizdə tətbiq edilir. Azərbaycanın səhiyyə sahəsində qazandığı uğurlar gələcəkdə də davam etdirilərək, sektorun daha da gücləndirilməsi üçün əhəmiyyətli addımlar atılacaq.
Maral Şahverdili
Nihat Tahirov
10:10 18.12.2024
Oxunuş sayı: 18881
