Cənubi Qafqazda yeni hərbi xəritə - Azərbaycan və Gürcüstan yaxınlaşması nə vəd edir?
Azərbaycan və Gürcüstan arasında hərbi əməkdaşlıq məsələlərinin gündəmdə olması Cənubi Qafqazda təhlükəsizlik arxitekturasının getdikcə daha çox regional əməkdaşlıq üzərində formalaşdığını göstərir.
Son illərdə iki ölkə arasında münasibətlər təkcə siyasi və iqtisadi sahələrlə məhdudlaşmır, eyni zamanda müdafiə və təhlükəsizlik istiqamətində də ardıcıl şəkildə inkişaf edir.
Gürcüstan ordusunun gücü və potensialı, onun NATO standartlarına uyğun modernləşmə prosesi, eləcə də Türkiyə ilə hərbi əməkdaşlıq təcrübəsi regionda diqqət çəkən əsas amillərdəndir.
Bəs Gürcüstan Silahlı Qüvvələrinin hazırkı imkanları nədən ibarətdir və Azərbaycanla hərbi əməkdaşlıq hər iki tərəfə hansı strateji üstünlüklər vəd edir?
Mövzu ilə bağlı hərbi ekspert Üzeyir Cəfərov Crossmedia.az-a açıqlama verib:
“Azərbaycanla Gürcüstan arasında hərbi əməkdaşlıq son illərdə daha da genişlənir və yeni məzmun qazanır. Bunun əsas səbəblərindən biri odur ki, hər iki ölkə qonşudur və Gürcüstan Silahlı Qüvvələrinin NATO standartlarına uyğunlaşdırılması prosesində qardaş Türkiyənin mühüm rolu var.
Bu baxımdan, Gürcüstan ordusu Azərbaycanın son illərdə əldə etdiyi hərbi uğurları və təcrübəni də yaxından öyrənir. Gürcüstan bu gün regionda kifayət qədər nüfuz sahibi olan bir dövlətdir və Azərbaycanın strateji tərəfdaşlarından biridir.
İki ölkə arasında siyasi, iqtisadi, nəqliyyat, enerji və təhlükəsizlik sahələrində sıx əməkdaşlıq mövcuddur. Elə ötən günlərdə yenidən fəaliyyətə başlayan Bakı-Tbilisi-Bakı sərnişin qatarı da bunu göstərir.
Eyni zamanda, Bakı-Tbilisi-Qars dəmir yolu xətti regionun ən mühüm nəqliyyat layihələrindən biri olaraq fəaliyyətini davam etdirir. Bütün bunlar onu göstərir ki, Azərbaycan-Gürcüstan münasibətləri yüksələn xətt üzrə inkişaf edir.
Ona görə də Azərbaycanla Gürcüstan arasında hərbi əməkdaşlıq son illərdə təkcə ikitərəfli formatda deyil, həm də Azərbaycan-Türkiyə-Gürcüstan üçtərəfli əməkdaşlıq modeli çərçivəsində inkişaf edir. Ordularımız birgə hərbi təlimlərdə iştirak edir, qarşılıqlı təcrübə mübadiləsi aparır və bir-birinə dəstək göstərirlər”.
Ekspert əlavə edib ki, bu nöqteyi-nəzərdən hesab edirəm ki, Azərbaycan-Gürcüstan əlaqələri olduqca önəmlidir və hər iki ölkə üçün strateji əhəmiyyət daşıyır:
“Dövlət rəhbərləri də bu sahəyə xüsusi diqqət və qayğı göstərirlər. Buna görə də hərbi əməkdaşlığın gələcəkdə daha da genişlənəcəyi gözləniləndir. Region kifayət qədər həssas geosiyasi məkan hesab olunur.
Həm Gürcüstan, həm də Azərbaycan bunu yaxşı anlayır. Eyni zamanda, ölkələrimiz arasında formalaşmış iqtisadi əlaqələr və qarşılıqlı maraqlar bizi daha sıx əməkdaşlığa sövq edir. İqtisadi layihələrin təhlükəsizliyinin təmin olunması da hərbi əməkdaşlığın gücləndirilməsini zəruri edir.
Çünki tərəflər öz iqtisadi dayaqlarının və strateji layihələrinin kənar müdaxilələr nəticəsində zərər görməsini istəmirlər. Məhz buna görə də Azərbaycan və Gürcüstan mütəmadi olaraq birgə hərbi təlimlər keçirirlər. Hər iki ölkə bir-birində hərbi attaşelər vasitəsilə təmsil olunur, səfirliklər və müdafiə qurumları arasında sıx əlaqələr saxlanılır.
Gürcüstanın Azərbaycana, Azərbaycanın isə Gürcüstana verə biləcəyi çoxsaylı faydalar mövcuddur. Bu faydalar sırasında hərbi əməkdaşlıq da özünəməxsus və mühüm yer tutur”.
Ayhan
14:15 01.06.2026
Oxunuş sayı: 49
