TƏBİB nümayəndələri beynəlxalq seminarda iştirak ediblər
TƏBİB nümayəndələri inkişaf etməkdə olan ölkələrin dövlət qurumlarının nümayəndələri üçün Çin Xalq Respublikasında təşkil olunan seminara qatılıb.
“Bir kəmər, bir yol” təşəbbüsü çərçivəsində Çin Xalq Respublikasının Pekin və Hanqco şəhərlərində keçirilən “Ağıllı idarəetmə və informasiyalaşdırma” mövzusundakı növbəti seminarda TƏBİB-in İcraçı direktorunun müavini Araz Nəsirov və Strateji inkişaf departamentinin Proseslərin optimallaşdırılması şöbəsinin müdiri Ziya Məmmədzadə iştirak edib.
Xüsusi mühazirələr və işgüzar səfərlərlə davam edən seminar inkişaf etməkdə olan ölkələr arasında beynəlxalq mübadilə və əməkdaşlıq üçün platforma yaratmaq məqsədi daşıyır.
14 ölkədən 40 rəsmi şəxsin iştirak etdiyi seminarda “Bir kəmər, bir yol” təşəbbüsü və onun həyata keçirilməsi tədbirləri, Çinin innovasiya və texnologiyaların iqtisadiyyatın müxtəlif sahələrində tətbiqi təcrübəsi, innovativ idarəetmə konsepsiyası, ağıllı şəhər əməliyyat platforması, ağıllı səhiyyə modelinin icmalı, Çinin ağıllı hökumətinin inkişafı vəziyyəti, bulud əsaslı ağıllı hökumət təcrübəsi, ağıllı hökumət texnologiyasının inkişaf tendensiyası və digər mövzular müzakirə edilib, müxtəlif müəssisələrə praktiki tanışlıq səfərləri təşkil edilib.
Həmçinin əməkdaşlarımız seminar çərçivəsində Pekin Universitetinin Beynəlxalq Xəstəxanasına (PKUIH) səfər edib, burada pasiyentyönümlü ağıllı həllər və tibb müəssisəsinin təqdim etdiyi xidmətlərlə tanış olublar. Diqqətə çatdırılıb ki, ağıllı xəstəxana modelində fəaliyyət göstərən tibb müəssisəsinin əsas üstünlüyünü ağıllı palatalar təşkil edir. Palataların iş prinsipi “bulud” serverləri üzərində qurulur. Xəstənin ilkin müraciətindən başlayaraq xəstəxananı tərk edənə kimi onun haqqında bütün məlumatlar “bulud”a ötürülür və burada saxlanılır.
Qeyd edək ki, tədbirin sonunda TƏBİB nümayəndələri Çin Xalq Respublikasının Ticarət Nazirliyi tərəfindən sertifikatlarla təltif edilib.
04:12 17.12.2024
Oxunuş sayı: 17792
