Tranzit prosedurları sadələşir - Orta Dəhlizin rəqabət qabiliyyəti artır
Avropa-Qafqaz-Asiya beynəlxalq nəqliyyat dəhlizi (TRACECA) çərçivəsində tranzit icazələrinin vahid blankının tətbiqi region ölkələri arasında daşımaların sadələşdirilməsi və sürətləndirilməsi baxımından mühüm addımdır.
Saziş sənəd dövriyyəsini unifikasiya edir, inzibati prosedurları azaldır və tranzit xərclərini optimallaşdırır. Bu da öz növbəsində Orta Dəhlizin rəqabət qabiliyyətini artırır, yükdaşımaların daha operativ həyata keçirilməsinə və ölkələrin tranzit gəlirlərinin yüksəlməsinə şərait yaradır.
Mövzu ilə bağlı iqtisadçı Rəşad Həsənov Crossmedia.az-a açıqlama verib:
“Bu, kifayət qədər əhəmiyyətli hesab oluna biləcək bir məsələdir. Çünki uzun müddətdir bu istiqamətdə həm müzakirələr aparılır, həm də texniki hazırlıq işləri görülürdü.
Bu saziş bir sıra istiqamətlərdə həm daşıyıcılar, həm də bu marşrut üzərində yerləşən ölkələr üçün yeni imkanlar formalaşdırır. Daşıyıcılar üçün müsbət tərəf ondan ibarətdir ki, prosesin tranzaksiya xərcləri aşağı düşür. Yəni əlavə inzibati prosedurlara ehtiyac aradan qalxır, əlavə rəsmiləşdirmələr, sənədlərin tələb olunması və icazələrin alınması kimi mərhələlər sadələşir.
Bu isə həm vaxta qənaət imkanı yaradır, həm də ümumi xərclərin optimallaşmasına gətirib çıxarır. Yekunda isə nəticə olaraq xidmətin daha sürətli şəkildə icra olunması imkanı formalaşır”.
İqtisadçı əlavə edib ki, xüsusilə də Orta Dəhliz üçün bu, mühüm məqamlardan biridir:
“Hazırda nəqliyyat dəhlizləri arasında gedən əsas rəqabət məhz xərclər, vaxt tələbi və infrastruktur imkanları ilə bağlıdır. Bu sazişin imzalanması və vahid formanın təsdiqlənməsi bu istiqamətdə mühüm nəticələrə gətirib çıxarır.
Ölkələr üçün gözlənti isə ondan ibarətdir ki, dəhlizin rəqabət qabiliyyəti artdıqca tranzit daşımaların həcmi genişlənir, dəhlizin ötürmə qabiliyyəti güclənir və nəticə etibarilə ölkələrin tranzit gəlirləri artır.
Bu, ümumilikdə yeni imkanların formalaşmasına xidmət edir. Düşünürəm ki, qəbul edilən bu yanaşma Azərbaycanın tranzit dəhlizləri ilə bağlı iddialarının və ümumi strategiyasının fəlsəfəsinə də uyğun gəlir”.
Ayhan
15:43 15.05.2026
Oxunuş sayı: 51
