Ingla School Baku-da Heydər Əliyevin 103 illiyinə həsr olunmuş riyaziyyat olimpiadası keçirildi
Ingla School Baku-da ümummilli lider Heydər Əliyevin anadan olmasının 103-cü ildönümünə həsr olunmuş riyaziyyat olimpiadası uğurla təşkil edildi. Tədbirin əsas məqsədi şagirdlərdə məntiqi düşüncə, analitik yanaşma və riyaziyyata olan marağı artırmaq, eyni zamanda onların bilik və bacarıqlarını yoxlamaq idi.
Olimpiadada 5–6, 7–8 və 9–11-ci sinif şagirdləri iştirak etdilər. İmtahan hər üç dildə — Azərbaycan, rus və ingilis dillərində təşkil olundu ki, bu da fərqli dil mühitində təhsil alan şagirdlər üçün bərabər imkanlar yaratdı. İştirakçılar 90 dəqiqə ərzində xüsusi hazırlanmış sualları cavablandıraraq öz biliklərini nümayiş etdirdilər.
Suallar şagirdlərin yaş xüsusiyyətlərinə uyğun olaraq tərtib edilmiş və onların məntiqi təfəkkürünü, problem həll etmə bacarıqlarını və sürətli düşünmə qabiliyyətlərini ölçməyə yönəlmişdi. Olimpiada iştirakçıları arasında sağlam rəqabət mühiti yaradıldı və bu da şagirdlərin motivasiyasını daha da artırdı.
Tədbirin sonunda yüksək nəticə göstərən şagirdlərin mükafatlandırılması nəzərdə tutulur. Bu cür təşəbbüslər Ingla School Baku-nun təhsildə keyfiyyətə, innovativ yanaşmalara və şagirdlərin hərtərəfli inkişafına verdiyi önəmi bir daha nümayiş etdirir.
Ingla School Baku gələcəkdə də bu kimi bilik yarışları və intellektual tədbirlər təşkil edərək şagirdlərin potensialını üzə çıxarmağa davam edəcək.
18:35 04.05.2026
Oxunuş sayı: 53
