Çexiyada skripkaçı Canel Nəcəflinin konserti keçirilib
Çexiyada yaşayan azərbaycanlı gənc skripkaçı Canel Nəcəflinin Plzen şəhərindəki Musiqi Evinin Antonin Dvorjak zalında konserti keçirilib.
Konsertdə Azərbaycan Respublikasının Çex Respublikasındakı səfirliyinin nümayəndələri, Praqa Azərbaycan Evinin rəhbəri, şair və dramaturq Leyla Begim Cəfərova və Çexiyadakı Azərbaycan diasporunun üzvləri iştirak edib.
Musiqili proqram bəstəkar Pyotr Çaykovskinin skripka üçün bəstələdiyi əsərlərinin səsləndirilməsi ilə başlayıb. Canel Nəcəfli pianoda Barbora Prokopovanın müşayiəti ilə bu əsərləri yüksək peşəkarlıqla ifa edərək dinləyiciləri heyran qoyub.
Daha sonra akkordeon ifaçısı Yarmila Vlaxovanın iştirakı ilə bəstəkar Astor Pyatsollanın bəstələrindən seçilmiş parçalar böyük maraqla qarşılanıb. Ardınca səhnəyə violonçel ifaçısı Mixail Harinq də qoşulub. Beləliklə ifalar trio formatında davam edib və üç alətin birgə səslənməsi ansamblın musiqi ahəngini daha zəngin və təsirli edib.
Qeyd edək ki, Çexiyada “Orfeus – İlin Adamı 2020” mükafatına layiq görülən, hazırda Plzen Konservatoriyasında təhsil alan istedadlı skripkaçı Canel Nəcəfli ölkəmizin zəngin mədəni irsinin tanıdılması məqsədilə müxtəlif tədbirlərdə iştirak edir.
18:25 30.04.2026
Oxunuş sayı: 398
