Mina xəritələrinin verilməməsi Qarabağda bərpa prosesini çətinləşdirir- Ekspert
Azad olunmuş ərazilərdə təhlükəsizliyin təmin olunması və həyatın bərpası istiqamətində aparılan humanitar minatəmizləmə işləri mühüm əhəmiyyət daşıyır. Azərbaycan Minatəmizləmə Agentliyi tərəfindən təqdim edilən həftəlik məlumata əsasən, aprelin 13-dən 19-dək genişmiqyaslı əməliyyatlar çərçivəsində onlarla mina və partlamamış hərbi sursat aşkar edilərək zərərsizləşdirilib. Bu müddətdə minlərlə hektar ərazi təhlükədən təmizlənmiş, regionda bərpa və yenidənqurma proseslərinin sürətlənməsinə zəmin yaradılmışdır.
Məlum olduğu kimi, Qarabağın minalardan təmizlənməsi işləri sürətlə davam edir. Buna baxmayaraq, ekspertlər hesab edirlər ki, bu proses hələ illərlə davam etməlidiir.
Mövzu barədə hərbi ekspert Üzeyir Cəfərov Crossmedia.az-a bildirib ki, ANAMA-nın məlumatında göstərilən rəqəmlər bu gün digər güc strukturları ilə bərabər — Müdafiə Nazirliyi, Dövlət Sərhəd Xidməti və digər qurumlarla birlikdə — işğaldan azad olunmuş ərazilərdə mina təmizləmə əməliyyatlarının həyata keçirildiyini göstərir və bu iş hələ bir xeyli müddət davam edəcək: “Çünki 26 il müddətində, ümumilikdə rəqəmləri yuvarlaq götürdükdə, 30 ilə yaxın müddətdə Qarabağda ermənilər və onların havadarları sayısız-hesabsız tank əleyhinə minalar basdırıblar, piyadalar əleyhinə minalar yerləşdiriblər, partlamamış çoxlu sayda hərbi sursatları və təhlükəli maddələri isə müxtəlif yerlərə atıb, unudublar. Ona görə də bu iş hələ uzun müddət çəkəcək və mən düşünürəm ki, həm piyadalar əleyhinə, həm də tank əleyhinə minalar uzun illər bizim üçün çox böyük problemlər yaradacaq”.
Ekspert qeyd edib ki, bu səbəbdən işğaldan azad olunmuş ərazilərdə məskunlaşan insanlarla mütəmadi maarifləndirmə işi aparılır və bundan sonra da aparılacaq: “Amma bu o demək deyil ki, onlar riskdən tam sığortalanıblar. İnsanlarımız diqqətli və ehtiyatlı olmalıdırlar. Çünki Qarabağda həyata keçirilən mina təmizləmə işlərinə Azərbaycan hələ ötən həftələrdə beynəlxalq qurumları da dəvət edib ki, bu prosesə aktiv şəkildə qoşulsunlar və dəstək versinlər”.
Ü. Cəfərov vurğulayıb ki, bu iş böyük vəsait, böyük güc və böyük fədakarlıq tələb edir: “Ona görə də hesab edirəm ki, bu məsələdə Azərbaycana mütləq hərtərəfli dəstək olmalıdır. Dəstək olmadığı təqdirdə, biz bu işləri öz gücümüzə həyata keçirəcəyik, amma bunun nə qədər davam edəcəyini demək çətindir. Hər halda, ən azı bir neçə il ərzində Qarabağ ərazisində həm tank əleyhinə, həm piyadalar əleyhinə minaların, həm də partlamamış sursatların axtarışı davam edəcək”.
Ekspert əlavə edib ki, bunun əsas səbəblərindən biri mina xəritələrinin olmaması və ya düzgün tərtib edilməməsidir: “Ermənilərdə vaxtında mina xəritələri olmayıb və ya elmi tələblərə uyğun düzgün tərtib edilməyib. Bir sözlə, xaotik və nizamsız bir vəziyyət olub və bunun acısını bu gün həmin ərazilərə köçən Azərbaycan vətəndaşları çəkir. Bir neçə yüz insanımız həyatını itirib, bir çoxu isə əlil olub, bədən üzvlərini — əlini, ayağını, gözünü və digər nahiyələrini — itirərək bu minalardan zərər görüb.Təbii ki, onlar da istəyirlər ki, bu iş yüksək səviyyədə həyata keçirilsin. Amma bu, yenə də onların fiziki imkanlarından kənardır”.
Mehriban Yariyeva
19:35 23.04.2026
Oxunuş sayı: 43
