Azərbaycan - Suriya əməkdaşlığının inkişafı üçün böyük fürsətlər var
Prezident İlham Əliyev Suriya Ərəb Respublikasının keçid dövrü Prezidenti Əhməd Əl Şaraanı Azərbaycana səfərə dəvət edib.
Prezident bunu Antalya Diplomatiya Forumu çərçivəsində Əhməd Əl Şaraa ilə görüşündə deyib.
Dəvət məmnunluqla qəbul olunub.
Azərbaycan–Suriya münasibətləri son dövrlərdə regional geosiyasi proseslər fonunda yenidən aktuallıq qazanır. İki ölkə arasında əməkdaşlıq siyasi, iqtisadi və humanitar sahələrdə inkişaf potensialı ilə diqqət çəkir. Xüsusilə Yaxın Şərq və Cənubi Qafqaz arasındakı strateji əlaqələr bu münasibətlərin əhəmiyyətini artırır.
Milli Məclisin deputatı Tural Gəncəliyev bu barədə Crossmedia.az-a açıqlama verib. Onun sözlərinə görə, Azərbaycan-Suriya münasibətləri Azərbaycanın Yaxın Şərqlə, Yaxın Şərqin qapısı olan Şərqi Aralıq dənizi və Fars körfəzinə çıxan bir istiqamətdə Suriya Azərbaycan üçün bir qapı rolunu oynayır:
“Təbii ki, Azərbaycan-Suriya üçün də Cənubi Qafqaz bölgəsi, Xəzər hövzəsi və o cümlədən Böyük Qafqaza çıxış deməkdir. Suriya əvvəlkilərdən fərqli olaraq vətəndaş müharibəsi başa çatdıqdan sonra nisbətən stabil bir vəziyyətə qədəm qoymuşdur. Suriyanın cənub hissələri, yüksəklikləri və paytaxt Dəməşq şəhərindən cənubda olan hissələr hazırda İsrail tərəfindən işğal edilmişdir. Orada separatçılar və digər terrorçu qruplaşmalardan istifadə edilərək İsrail tərəfi Suriyanın ərazi bütövlüyünü, suverenliyini pozmaqda davam edir. Bu, Suriya üçün ciddi bir ərazi bütövlüyü məsələsi, suverenliyinə və ərazi bütövlüyünə risk yaradan bir faktordur. Ancaq Azərbaycan-Suriya münasibətlərindən danışdıqda onu demək lazımdır ki, Azərbaycan ərazi bütövlüyünü, suverenliyini bərpa edən bir ölkə kimi güclü bir ölkə olaraq yeni bir mərhələyə qədəm qoymuşdur və bizim Suriyayla münasibətlərimizə də məhz güclü Azərbaycanın Yaxın Şərq ölkələrindən bizim üçün ən əhəmiyyətli olan Suriyayla münasibətlərimizə yenidən baxmaq lazımdır”.
T.Gəncəliyev hesab edir ki, qardaş Türkiyə ilə bir yerdə biz Suriya dövləti ilə əməkdaşlığımızı daha effektiv və daha yüksək səviyyədə qururuq: “Çünki Türkiyə Suriyayla, Suriya Türkiyənin cənub qonşusudur, Azərbaycan Türkiyənin daha bir qonşusudur, yəni bu üç ölkəni birləşdirəcək Türkiyə var. Xüsusilə nəqliyyat və transport kommunikasiya xətlərinin güclənməsi, artması baxımından Azərbaycan-Suriya münasibətləri inkişaf edə bilər. Bildiyimiz kimi, Türkiyə hazırda yeni bir layihə, yeni Hicaz dəmir yolu xəttinin tikilməsi, fəaliyyətə başlaması ilə bağlı plan qüvvədədir. Belə ki, keçmiş tarixi Hicaz yolu üzərində inkişaf ediləcək gələcəkdə modern-müasir Hicaz dəmir yolu xətti. Fars körfəzi ilə Səudiyyə Ərəbistanından xüsusilə olacaq enerji daşıyıcılarının Səudiyyə Ərəbistanı, İordaniya, Suriya və Türkiyə üzərindən Avropaya çatdırılması deməkdir”.
Deputat əlavə edib ki, yeni Hicaz dəmir yolu xətti, Suriyadan keçən transport kommunikasiya xətlərinin Orta Dəhliz və Zəngəzur dəhlizi ilə birləşməsi möhtəşəm bir sintez və iki böyük layihənin bir inkorporasiyası, birləşməsi olaraq çox yaxşı bir transport habına çevrilmək baxımından həm Azərbaycan, həm də Suriyanın maraqlarındadır: “İkinci bir məsələ, Azərbaycan Şərqi Aralıq dənizinə, hansı ki dünyanın çox güclü geosiyasi mərkəzinə çevrilir. Şərqi Aralıq dənizinin geosiyasi bir mərkəzə çevrilməsi müzakirə mövzusudur. Türkiyənin, Suriyanın özünün və digər ölkələrin orada çox ciddi maraqları həm kəsişir, həm də toqquşur. Şərqi Aralıq dənizi sahillərində çox ciddi şəkildə qaz yataqlarının ehtimalı yüksəkdir. Artıq bir neçə böyük qaz yataqları orada kəşf edilmişdir. Bir növ Azərbaycan və Suriyanın əməkdaşlığı eyni zamanda enerji təhlükəsizliyi, alternativ enerji mənbələrinin də inkişafı baxımından, həm də ənənəvi enerji resurslarının istismarı, ixracı, nəqli baxımından əhəmiyyətli ola bilər. Ən böyük məsələ, Suriya azərbaycanlılar üçün tarixi bir ölkədir. Suriyada çoxlu azərbaycanəsilli vətəndaşlar, insanlar orada yaşayıb. İmadəddin Nəsimidən başlamış Suriyadan çox möhtəşəm mədəni miras, tarixi miras məsələləri gündəmdədir. Mirasın, mədəni əlaqələrin yüksəldilməsi, artırılması üçün də çox böyük imkan və fürsətlər mövcuddur. Hesab edirəm ki, Suriya ilə həm siyasi, hərbi, təhlükəsizlik, iqtisadi əlaqələr, transport kommunikasiya məsələləri, ticarət əlaqələri və nəhayət humanitar və mədəni əlaqələrin inkişafı üçün çox böyük fürsətlər, imkanlar mövcuddur”.
Fatimə
19:02 20.04.2026
Oxunuş sayı: 71
