Gürcüstanla əməkdaşlığın genişləndirilməsi ikitərəfli tərəfdaşlığın davamlı olacağını göstərir- Deputat
Pezident İlham Əliyevin Gürcüstana son səfəri yalnız rəsmi protokol çərçivəsində baş tutan diplomatik hadisə deyil, eyni zamanda regionun geosiyasi dinamikasını müəyyən edən mühüm siyasi mesaj kimi qiymətləndirilir. Bu səfər fonunda aparılan müzakirələr və keçirilən görüşlər Azərbaycan ilə Gürcüstan arasında formalaşmış strateji tərəfdaşlığın davamlı və dərin xarakter daşıdığını bir daha nümayiş etdirir.
İki ölkə arasında münasibətlər artıq klassik diplomatik əməkdaşlıq mərhələsini geridə qoyaraq, enerji təhlükəsizliyi, nəqliyyat-logistika layihələri və regional sabitliyin təmin olunması kimi fundamental istiqamətləri əhatə edən çoxşaxəli əməkdaşlıq səviyyəsinə yüksəlib. Prezidentlərin qarşılıqlı etimada əsaslanan dialoqu isə bu münasibətlərin yalnız siyasi deyil, həm də strateji müttəfiqlik səviyyəsinə çatdığını göstərir.
Bu baxımdan, səfər iki dövlət arasında mövcud olan yüksək səviyyəli diplomatik münasibətlərin, qarşılıqlı maraqlara əsaslanan əməkdaşlıq modelinin və regionda sabitliyin qorunmasına yönəlmiş ortaq siyasi iradənin bariz nümunəsi kimi çıxış edir.
Mövzu ilə bağlı Milli Məclisin deputatı Ülviyyə Həmzəyeva Crossmedia.az-a açıqlama verib:
"2026-cı il aprelin 6-da Azərbaycan Respublikasının Prezidenti İlham Əliyev Gürcüstana rəsmi səfəri zamanı mətbuata verdiyi bəyanatda iki ölkə arasındakı münasibətlərin yüksək səviyyədə olduğunu bir daha vurğuladı. Prezidentin çıxışı Azərbaycan–Gürcüstan əməkdaşlığının müxtəlif istiqamətlərini əhatə edərək, həm tarixi dostluğa, həm də gələcək inkişaf perspektivlərinə geniş yer ayırdı. Azərbaycan Respublikasının Prezidenti cənab İlham Əliyev çıxışında qeyd etdi ki, Azərbaycan və Gürcüstan xalqları əsrlər boyu dostluq və qardaşlıq şəraitində yaşamış, bu ənənələr bu gün də uğurla davam etdirilməkdədir, həmçinin İki ölkə artıq müstəqil dövlətlər kimi qarşılıqlı hörmət və etimada əsaslanan münasibətlər quraraq, regionda sabitliyin əsas dayaqlarından birinə çevrilib.
Ölkə Rəhbərimizin Gürcüstana səfəri iki ölkə arasındakı əlaqələrə də yeni təkan verəcək və təbii ki, müzakirə olunan məsələlər əməkdaşlığın daha da genişlənəcəyini göstərir.
Bu fonda, Gürcüstanın son illərdə əldə etdiyi iqtisadi uğurlar ölkə rəhbərimiz tərəfindən xüsusi qeyd olundu. Bildirildi ki, ölkədə mövcud olan əlverişli sərmayə mühiti Azərbaycan investorlarının da marağını artırır.
Bu günə qədər Azərbaycan tərəfindən Gürcüstan iqtisadiyyatına 3,7 milyard dollar sərmayə qoyulub. Ticarət dövriyyəsi isə artıq 800 milyon dolları keçib və yaxın gələcəkdə bu rəqəmin 1 milyard dollara çatacağı gözlənilir".
Deputata əlavə edib ki, Azərbaycan Respublikasının Prezidenti cənab İlham Əliyev, həmçinin yeni birgə investisiya layihələrinin müzakirə edildiyini və gələcəkdə üçüncü ölkələrdə də ortaq layihələrin həyata keçirilə biləcəyini bildirdi:
"Azərbaycan və Gürcüstan beynəlxalq təşkilatlarda daim bir-birinin mövqeyini dəstəkləyən ölkələr kimi çıxış edir. Bu isə,
Prezident İlham Əliyevin vurğuladığı kimi, tərəflərin qarşılıqlı olaraq ərazi bütövlüyü, suverenlik və sərhədlərin toxunulmazlığı prinsipinə sadiqliyi və bu siyasətin gələcəkdə də davam etməsi deməkdir.
Cənab Prezident öz çıxışında Cənubi Qafqaz regionunda yaranan yeni reallıqlara da toxundu. O, qeyd etdi ki, region artıq münaqişə məkanı olmaqdan çıxaraq, sülh və əməkdaşlıq məkanına çevrilməkdədir.
Bu kontekstdə Ermənistanla sülh prosesinin əhəmiyyəti vurğulandı. Bildirildi ki, sülhün möhkəmlənməsi üçün yalnız sənədlər deyil, praktik addımlar da vacibdir və iqtisadi əməkdaşlıq bu prosesdə mühüm rol oynaya bilər. Hazırda Azərbaycan və Ermənistan arasında müəyyən ticarət əməliyyatlarının Gürcüstan vasitəsilə həyata keçirilməsi də bu əməkdaşlığın bir nümunəsi kimi göstərildi.
Azərbaycanın enerji siyasəti və bu siyasətin region üçün əhəmiyyəti xüsusi diqqət mərkəzində oldu. Qeyd edildi ki, Azərbaycan qazı bu gün 16 ölkəyə ixrac olunur və bu prosesdə Gürcüstan əsas tranzit ölkədir.
Xüsusilə Bakı-Tbilisi-Ceyhan neft kəməri və Cənub Qaz Dəhlizi kimi iri layihələrin regionun enerji təhlükəsizliyində mühüm rol oynadığı vurğulandı. Bununla yanaşı, Orta Dəhliz nəqliyyat marşrutu da Azərbaycan və Gürcüstan üçün strateji əhəmiyyət daşıyır və hazırda onun genişləndirilməsi istiqamətində işlər davam etdirilir.
Azərbaycan Respublikasının Prezidenti cənab İlham Əliyevin Gürcüstana səfəri bir daha göstərdi ki, Azərbaycan–Gürcüstan münasibətləri regionda nümunəvi tərəfdaşlıq modelidir. Qarşılıqlı hörmət, etimad və ortaq maraqlara əsaslanan bu əlaqələr yalnız iki ölkə üçün deyil, bütövlükdə region üçün sabitlik və inkişafın əsas təminatçılarından biridir. Eləcə də,
gələcəkdə yeni layihələrin həyata keçirilməsi və əməkdaşlığın daha da genişləndirilməsi bu tərəfdaşlığın uzunmüddətli və dayanıqlı olacağını göstərir".
Ayhan
19:05 08.04.2026
Oxunuş sayı: 127
