Gürcüstan baş nazirinin Azərbaycan prezidentini şəxsən qarşılaması münasibətlərin yüksək səviyyəsinin göstəricisidir- Ekspert
Gürcüstanın Baş naziri İrakli Kobaxidzenin Azərbaycan Prezidentinin səfərinə verdiyi yüksək dəyər və bu səfərin ikitərəfli münasibətlərin inkişafına töhfə verəcəyinə dair fikirləri rəsmi Tbilisinin Bakı ilə əməkdaşlığa xüsusi önəm verdiyini bir daha nümayiş etdirir. Prezident İlham Əliyevin Gürcüstana hər səfərinin strateji müzakirələr və yeni təşəbbüslərlə yadda qalması isə iki ölkə arasında münasibətlərin dinamik və yüksələn xətt üzrə inkişaf etdiyini göstərir.
Bu kontekstdə diqqət çəkən əsas məqamlardan biri də son illərdə Azərbaycan–Gürcüstan münasibətlərinin hansı mərhələdə olmasıdır. Artan siyasi dialoq, genişlənən iqtisadi əlaqələr və regionda birgə həyata keçirilən strateji layihələr fonunda bu münasibətlərin artıq kulminasiya nöqtəsinə çatıb-çatmadığı, yoxsa hələ də inkişaf potensialının davam etdiyi sualı aktuallıq kəsb edir.
Mövzu ilə bağlı politoloq Zeynal Əmrəliyev Crossmedia.az-a açıqlama verib:
"Azərbaycan və Gürcüstan arasındakı münasibətlərin tarixi əhəmiyyəti olduqca böyükdür. Hər iki ölkə oxşar inkişaf yolu keçib və daim qarşılıqlı şəkildə münasibətlərin sağlam və sabit qalmasına çalışıb. Sevindirici haldır ki, bu münasibətlərin pozulmasına indiyədək nə Bakı, nə də Tbilisi imkan verib. Bu gün Azərbaycan və Gürcüstan arasında həm mehriban qonşuluq münasibətləri, həm də çox yaxın dostluq və strateji əlaqələr yüksək səviyyədədir. Xüsusilə enerji sektorunda iki ölkə arasında güclü əməkdaşlıq mövcuddur. Eyni zamanda, Azərbaycan və Gürcüstan bir sıra beynəlxalq platformalarda tərəfdaş ölkələr kimi çıxış edir və ən əsası, hər iki tərəf bir-birinin maraqlarını daim müdafiə etməyə çalışır".
Ekspert əlavə edib ki, Azərbaycan Prezidenti cənab İlham Əliyevin Gürcüstana səfəri də bu baxımdan xüsusi əhəmiyyət kəsb edir: "Səfər çərçivəsində dövlət başçısı Gürcüstanda mühüm görüşlər keçirib və yüksək səviyyədə qarşılanıb. Onun həm ölkə prezidenti, həm baş naziri, həm də hakim partiyanın rəhbərliyi ilə keçirdiyi görüşlər zamanı Azərbaycan–Gürcüstan münasibətlərinin gələcək inkişaf mərhələləri geniş şəkildə müzakirə olunub.
Azərbaycana Gürcüstanda böyük önəm verilir və ölkəmiz ciddi hörmətə malikdir. Təsadüfi deyil ki, parlament respublikası olan Gürcüstanda əsas icraedici fiqur baş nazirdir və Azərbaycan Prezidentini şəxsən baş nazirin hava limanında qarşılayıb yola salması bu münasibətlərin yüksək səviyyəsinin göstəricisidir.
Gürcüstan Xarici İşlər Nazirliyinin yaydığı bəyanat da iki ölkə arasında münasibətlərin gələcək inkişafına mühüm töhfə verəcək amillərdən biri kimi qiymətləndirilə bilər".
Ayhan
19:00 08.04.2026
Oxunuş sayı: 55
