Azərbaycan minatəmizlə məsələsində təcrübəsini bölüşə biləcək ölkəyə çevrilib- Şərh
İkinci Qarabağ müharibəsindən sonra Azərbaycanın üzləşdiyi ən ciddi humanitar problemlərdən biri mina və partlamamış hərbi sursat təhlükəsidir. Bu təhlükə təkcə insan həyatı üçün risk yaratmır, eyni zamanda azad edilmiş ərazilərdə bərpa və yenidənqurma prosesini də ləngidir. Təsadüfi deyil ki, bu məsələ beynəlxalq medianın da diqqət mərkəzindədir. İordaniyanın “Ad-Dustour” qəzetində dərc olunan “Çirklənmədən bərpaya: Azərbaycan minatəmizləmə üzrə daha qətiyyətli qlobal tədbirlərə çağırır” başlıqlı məqalə bu problemin qlobal miqyasda aktuallığını bir daha ortaya qoyur.
Bu kontekstdə əsas suallardan biri də xarici təcrübənin və beynəlxalq tərəfdaşlığın Azərbaycana necə töhfə verə biləcəyidir. Müasir texnologiyaların tətbiqi, peşəkar mütəxəssislərin hazırlanması, maliyyə və texniki dəstək, eləcə də uğurlu beynəlxalq təcrübələrin paylaşılması mina təhlükəsinin daha sürətli və effektiv aradan qaldırılmasında mühüm rol oynaya bilər.
Mövzu ilə bağlı hərbi jurnalist Asif Quliyev Crossmedia.az-a açıqlama verib:
"Sözsüz ki, Azərbaycanın minalarla çirklənmiş əraziləri kifayət qədər genişdir və bu fakt beynəlxalq hesabatlarda da öz əksini tapır. Azərbaycan dünyada ən çox minalarla çirklənmiş ölkələr sırasındadır. Üstəlik, bu minaların xəritələrinin olmaması və onların basdırılması zamanı heç bir qaydalara əməl edilməməsi vəziyyəti daha da təhlükəli edir. Bu, məsələnin bir tərəfidir. Digər tərəfdən isə Azərbaycan mina təhlükəsi ilə üzləşdiyi ilk gündən, yəni bu sahədə fəaliyyətə başladığı vaxtdan etibarən beynəlxalq əlaqələri prioritet hesab edib. ANAMA-nın yaradılması ilə bu istiqamətdə beynəlxalq təcrübədən yararlanmaq, xarici mütəxəssisləri cəlb etmək və əməkdaşlıq qurmaq əsas istiqamətlərdən biri olub. Hesab edirəm ki, proses bundan sonra da davam edəcək. Bu gün həyata keçirilən mina təmizləmə əməliyyatlarında beynəlxalq ekspertlərin iştirakı, onların rəyləri, eləcə də bu sahədə keçirilən beynəlxalq konfranslar və simpoziumlar Azərbaycanın beynəlxalq əməkdaşlığa verdiyi önəmi açıq şəkildə göstərir və bu əməkdaşlıq ölkəyə ciddi faydalar qazandırır".
Ekspert qeyd edib ki, bununla yanaşı, xüsusi olaraq qeyd etmək lazımdır ki, Azərbaycan artıq uzun illərdir mina təmizləmə fəaliyyəti ilə məşğuldur: "Bu müddət ərzində ölkədə kifayət qədər təcrübəli və peşəkar mütəxəssislər formalaşıb. Bu gün Azərbaycan yalnız yardım alan tərəf deyil, eyni zamanda beynəlxalq müstəvidə digər ölkələr üçün nümunə ola biləcək, təcrübəsini bölüşə, məsləhətlər verə və təlimlər keçirə biləcək potensiala malikdir. Ona görə də bu əməkdaşlıqları təkcə Azərbaycana edilən yardım kimi deyil, həm də Azərbaycanın öz təcrübəsini paylaşması baxımından qarşılıqlı faydalı proses kimi qiymətləndirmək olar".
Ayhan
18:50 08.04.2026
Oxunuş sayı: 59
