Xarici xəbərlər

ABŞ-nin İranla bağlı 4 variantı var, lakin heç biri ideal deyil

Vaşinqton administrasiyasının İranla bağlı ən azı dörd mümkün ssenarisi mövcuddur, lakin onların heç biri ABŞ üçün tam əlverişli hesab edilmir.

Crossmedia.az bu barədə "The Atlantic" ə istinadən xəbər verir.

Nəşrin təhlilinə görə, ilk variant kimi ABŞ-nin Xarq adası kimi əsas neft infrastrukturlarını ələ keçirmək üçün məhdud quru əməliyyatı keçirməsi göstərilir. Bununla yanaşı, zənginləşdirilmiş uranın ələ keçirilməsi üçün xüsusi təyinatlı qüvvələrin göndərilməsi ehtimalı da qeyd olunur. Lakin bu addımın ciddi eskalasiya və neft qiymətlərində kəskin artım riski yarada biləcəyi vurğulanır.

İkinci ssenari ABŞ-nin birtərəfli qaydada qələbə elan edərək qoşunlarını çıxarmasıdır. Bununla belə, bu halda münaqişənin yenidən alovlanma ehtimalı qalır və region ölkələrinin, o cümlədən Səudiyyə Ərəbistanı kimi müttəfiqlərin öz təhlükəsizlikləri üçün nüvə proqramlarına yönələ biləcəyi bildirilir.

Üçüncü variant Vaşinqton və Tehran arasında danışıqların bərpasıdır. Lakin analitiklər bu ssenarinin uğur şansını aşağı qiymətləndirir. Hətta razılaşma əldə olunsa belə, İranın sanksiyaların ləğvindən əldə etdiyi gəlirləri hərbi imkanlarını gücləndirməyə yönəldə biləcəyi qeyd olunur ki, bu da regionda yeni gərginliklər yarada bilər.

Dördüncü variant isə quru işğalı olmadan hərbi əməliyyatların davam etdirilməsidir. Lakin məqalədə bildirilir ki, bu halda ABŞ-ın hərbi resursları sürətlə tükənə bilər və ölkə daxilində inflyasiya və yanacaq qiymətlərinin artması ictimai narazılığı gücləndirir.

🖨 Çap et

11:53 02.04.2026

Oxunuş sayı: 229