Xarici xəbərlər

Ukraynanın neft hücumları Rusiyanın gəlirlərini artıra bilər

Ukraynanın Rusiya neft infrastrukturuna endirdiyi zərbələr hələlik gözlənilən effekti vermir və əksinə, Moskvanın gəlirlərinin artmasına səbəb ola bilər.

Crossmedia.az bu barədə xarici mediaya istinadən xəbər verir ki, bu qiymətləndirmə analitik Alexander Kolyandr tərəfindən verilib.

Onun sözlərinə görə, mart ayında Rusiyanın ixrac potensialının təxminən 40 faizi hücumlara məruz qalsa da, 2024-cü il vergi dəyişikliklərindən sonra büdcə gəlirləri əsasən ixracdan deyil, hasilat vergisindən formalaşır. Bu isə o deməkdir ki, neft ixrac olunmasa belə, hasilat zamanı büdcəyə vəsait daxil olur.

Analitik qeyd edir ki, infrastruktura hücumlar qlobal bazarda təklifi azaldaraq neft qiymətlərini yüksəldir. Hörmüz boğazı ətrafındakı gərginlik fonunda qiymətlər artıq bir barel üçün 100 dolları keçib, Rusiyanın “Urals” markalı nefti isə mart ayında əhəmiyyətli dərəcədə bahalaşıb.

Nəticədə, qiymət artımı Rusiya büdcəsinə əlavə gəlir gətirir. Hesablamalara görə, neftin hər 10 dollar bahalaşması aylıq təxminən 1,5 milyard dollar əlavə qazanc deməkdir. Bu səbəbdən ixrac azalsa belə, artan qiymətlər itkiləri kompensasiya edir və ümumi gəlirlər yüksələ bilər.

🖨 Çap et

14:54 27.03.2026

Oxunuş sayı: 369