Hərbi əməkdaşlıq türk dövlətlərini gücləndirir - ŞƏRH
Türk Dövlətləri Təşkilatı (TDT) çərçivəsində üzv ölkələrin hərbi əməkdaşlığı son illərdə regional təhlükəsizlik və sülhü təmin etmək üçün müzakirə olunan əsas məsələlərdən biridir. Xüsusilə, Azərbaycan və Türkiyə arasında uzunmüddətli strateji əməkdaşlıq bu istiqamətdə nümunəvi rol oynayır.
Mövzu ilə bağlı Crossmedia.az-a danışan hərbi ekspert Ramil Məmmədli vurğulayıb ki, Türkiyə və Azərbaycanın hərbi əməkdaşlığı hələ 1994-cü ildən başlayıb və strateji tərəfdaşlıq çərçivəsində hərbi-texniki əməkdaşlıq prioritet sahələrdən birinə çevrilib. Onun sözlərinə görə, birgə keçirilən hərbi təlimlər iki ölkə arasında hərbi əlaqələrin güclənməsinə xidmət edir və qarşılıqlı təcrübə mübadiləsi ilə orduların döyüş hazırlığını artırır.
Ekspert əlavə edib ki, digər türk dövlətləri ilə bu istiqamətdə əməkdaşlığın inkişafı da diqqət mərkəzindədir. Xüsusən, 2024-cü ildə Azərbaycan və Qazaxıstan hərbçilərinin birgə təlimləri və Mərkəzi Asiya ölkələrinin kollektiv təlimlərində Azərbaycanın iştirakı bu əməkdaşlığın genişləndiyini göstərir. Bununla belə, Ramil Məmmədli qeyd edir ki, təşkilata üzv dövlətlərin bəzi fərqli təşkilatlara üzvlüyü məhdudiyyətlər yaradır. Məsələn, Türkiyə NATO üzvüdür, Qazaxıstan və Qırğızıstan isə KTMT-yə bağlıdır. Türkmənistan neytral siyasət yürüdür, Özbəkistan isə fərdi yanaşmalara üstünlük verir.
Türk Dövlətlərinin vahid hərbi birlik formatının yaradılması ideyası vaxtaşırı gündəmə gəlsə də, ekspert bildirir ki, bu konsepsiyanın reallaşması üçün müəyyən siyasi və praktiki maneələr var. Lakin ikitərəfli və hərbi-texniki əməkdaşlıq çərçivəsində konkret addımlar atmaq mümkündür. “Azərbaycan və Türkiyənin birgə hərbi təlimləri bölgədə sabitliyi təmin etmək və hərbi təhdidlərin qarşısını almaq baxımından mühüm rol oynayır,” – deyə Ramil Məmmədli qeyd edir.
Ekspert hesab edir ki, gələcəkdə Türk dövlətləri arasında hərbi əməkdaşlıq daha da genişlənə bilər. Bunun üçün üzv ölkələrin siyasi iradə nümayiş etdirməsi, birgə təlimlərin və texniki əməkdaşlığın artırılması vacibdir. Bu addımlar yalnız regional təhlükəsizliyi möhkəmləndirməklə qalmır, həm də strateji üstünlüklər qazandırır.
Son olaraq, Məmmədli bildirir ki, vahid hərbi əməliyyatların keçirilməsi üçün məqsəd və tərəf seçimi məsələləri hələ də müzakirə tələb edir. Buna baxmayaraq, Türk Dövlətləri Təşkilatının təhlükəsizlik sahəsində əməkdaşlığı genişləndirmək istiqamətində atdığı addımlar strateji perspektivlər üçün əlverişli zəmin yaradır.
Maral Şahverdili
13:04 07.12.2024
Oxunuş sayı: 7873
