Kirayə müqaviləniz yoxdursa?… Bu səhv sizi məhkəməyə apara bilər
Çox vaxt insanlar mənzili kirayə götürəndə tələsik, yalnız şifahi razılaşma əsasında götürür. Lakin bir müddət sonra ödəniş, kommunal xərclər, təmir və ya mənzilin boşaldılması ilə bağlı ciddi problemlərlə üzləşirlər.
Xüsusilə, yazılı müqavilə olmadıqda tərəflər arasında yaranan mübahisələr hüquqi çətinliklərə səbəb olur və məsələ məhkəmə müstəvisinə daşına bilir. Bu kimi halların qarşısını almaq üçün qanunvericiliyin tələbləri və hüquqi mexanizmlər nə deyir?
Mövzu ilə bağlı Crossmedia.az-a açıqlama verən Vəkillər kollegiyasının üzvü, vəkil Anar Ramazanov vurğulayıb ki, mülki hüquq münasibətləri tərəflər arasında müqavilə ilə tənzimlənir:
"Azərbaycan Respublikasının qanunvericiliyinə əsasən, müqavilələr yazılı və şifahi formada bağlanıla bilər. Bəzi müqavilələr var ki, onlar mütləq şəkildə yazılı olur. Kirayə müqaviləsi də Azərbaycan Qanunvericiliyinə əsasən yazılı bağlanmalı olan müqavilə sırasına aiddir. Lakin kirayə müqaviləsinin təsdiq olunmasına zərurət yoxdur.
Bununla bağlı Konstitusiya Məhkəməsinin müvafiq qərarı da var, orada bu kimi məsələlərə aydınlıq gətirilib. Tövsiyə olunur ki, mənzil kirayə edən şəxslərin hüquqlarının qorunması məqsədilə ev sahibi, mənzil mülkiyyətçisi ilə yazılı müqavilə bağlasın.
Həmin müqavilədə kirayənin müddəti, aylıq ödəniş şərtləri, mənzilin təhvil alınması-təhvil verilməsi şərtləri, mənzillə bağlı kommunal xərclər, əsaslı, cari təmir işləri, mənzilin ləvazimatları məsələləri müqavilədə tənzimlənməlidir.
Yazılı müqavilə olmadığı təqdirdə isə bütün bu məsələlər açıq qalır və yeni mübahisələrə səbəb olur. Odur ki, mənziı kirayələyən şəxslər yazılı müqavilə bağlamadığı halda kirayə götürməsi gələcəkdə əlavə mübahisələrə gətirib çıxara bilər ki, buna da ancaq məhkəmə aydınlıq gətirə bilər. Belə olduğu təqdirdə hər iki tərəf (kirayəçi, kirayə götürən) öz mübahisələrinə aydınlıq gətirmək üçün mütləq məhkəməyə müraciət etməlidirlər. Məhkəmə işin hallarına, tərəflərin müqavilə bağlayarkən ortaya qoyduqları istəyə uyğun olaraq mübahisəni həll edəcək.
Sonda A.Ramazanov qeyd edib ki yazılı müqavilə olmadan kirayəçi üçün xeyli hüquqi risklər yarada bilər.
Fatimə Məmmədova
10:15 24.02.2026
Oxunuş sayı: 608
