Azərbaycanın hərbi sənaye potensialı əhəmiyyətli dərəcədə artacaq - SƏBƏB
Son illərdə Azərbaycan, Türkiyə və Pakistan arasında hərbi əməkdaşlıq daha da güclənərək, bölgədə strateji tərəfdaşlıq üçün mühüm platforma yaratdı. "Üç qardaş" ölkələri arasındakı tarixi, mədəni və siyasi bağlar hərbi əməkdaşlıq sahəsində də özünü göstərməkdədir. Birgə hərbi təlimlər, müdafiə sənayesi sahəsində layihələr və regional təhlükəsizliyin təmin edilməsi üçün ortaq səylər bu əməkdaşlığı yeni səviyyəyə qaldırıb.
Azərbaycan Ordusunun Qarabağ müharibəsində qazandığı zəfər, Türkiyə və Pakistanın verdiyi mənəvi dəstək və hərbi texnologiya sahəsində yardımları bu üçtərəfli əlaqələrin nə qədər dərin olduğunu bir daha göstərdi.
Milli Məclisin deputatı Ceyhun Məmmədov bu əməkdaşlığın əhəmiyyətini vurğulayaraq bildirib ki, Azərbaycan, Türkiyə və Pakistan arasında hərbi əlaqələr ən yüksək səviyyəyə çatıb. O qeyd edib ki, dünyada mövcud mürəkkəb geosiyasi vəziyyət bu üçtərəfli əməkdaşlığın daha da güclənməsini tələb edir. Deputat bildirib: "Hazırkı şəraitdə qarşıdurmaların artması və strateji ərazilərdəki gərginliklər üç ölkə arasında hərbi əməkdaşlığın genişləndirilməsini zəruri edir. Bakıda həmrəylik ruhu hökm sürür və Azərbaycan, Türkiyə ilə birgə fəaliyyətlərində daima yüksək standartlara sadiq qalır. Pakistan da bu strateji əməkdaşlığın fəal tərəfdaşıdır."
Deputat əlavə edib ki, Azərbaycan-Türkiyə-Pakistan əməkdaşlığı təkcə hərbi sahə ilə məhdudlaşmır. Bu tərəfdaşlıq müxtəlif iqtisadi, texnoloji və siyasi sahələrdə də inkişaf etdirilir. Hər üç ölkə müdafiə sənayesində birgə layihələrə imza atır və yeni texnologiyaların tətbiqi üçün ciddi addımlar atır.
C.Məmmədov həmçinin vurğulayıb ki, Türkiyədən alınan yüksək keyfiyyətli silahlar və Pakistandan alınan hərbi aviasiya texnologiyaları Azərbaycan Ordusunun güclənməsinə mühüm töhfə verir. Onun sözlərinə görə, gələcəkdə bu əməkdaşlıq çərçivəsində silahların təmiri, modernizasiyası və istehsalı kimi daha genişmiqyaslı layihələr həyata keçiriləcək.
Ceyhun Məmmədov bu əməkdaşlığın təkcə hərbi güc artırmaq deyil, həm də regional təhlükəsizliyə xidmət etdiyini vurğulayıb:
"Azərbaycan müdafiə sənayesində yeni addımlar atır və bu sahədə ciddi irəliləyişlər etməyi planlaşdırır. Türkiyə və Pakistanın təcrübəsindən faydalanaraq, Azərbaycanın hərbi sənaye potensialı əhəmiyyətli dərəcədə artacaq. Gələcəkdə isə bu tərəfdaşlıq daha geniş miqyaslı regional layihələrə çevrilə bilər."
Bu əməkdaşlıq yalnız hərbi sahədə deyil, həm də regional sabitlik və inkişafın təmin edilməsi üçün önəmli bir mexanizm olaraq dəyərləndirilir. “Üç qardaş” ölkələrinin birlikdə hərəkət etməsi dünyaya bir həmrəylik nümunəsi göstərir.
Nihat Tahirov
11:10 04.12.2024
Oxunuş sayı: 5597
