İranda polis zabitinin qətli: məsuliyyəti Xalq Mübarizləri Cəbhəsi üzərinə götürdü
İranın Sistan və Bəluçistan əyalətinin İranşəhr şəhərində polis postunun komandirinin öldürülməsi ilə bağlı məsuliyyəti Xalq Mübarizləri Cəbhəsi öz üzərinə götürdüyünü açıqlayıb.
Crossmedia.az xarici mediaya istinadən xəbər verir.
Qrupun yaydığı bəyanatda bildirilir ki, hücum “ölkə daxilində etirazçıların öldürülməsi və sıxışdırılmasına cavab olaraq” həyata keçirilib. Bəyanatda qeyd olunur ki, post komandiri etnik bəluçların öldürülməsində şəxsən iştirak edib və “hədəf əməliyyatı” zamanı zərərsizləşdirilib.
Hökumət mediasının məlumatına görə, qətlə yetirilən polis zabiti Mahmud Həqiqətdir. “Haalvsh” xəbər kanalının bildirdiyinə əsasən, hadisə səhər saat 07:00 radələrində baş verib. Silahlı şəxslər polis komandirinin avtomobilinə atəş açıblar, nəticədə o həyatını itirib, avtomobil isə idarəetməni itirərək ağaca çırpılıb.
Qeyd edək ki, Xalq Mübarizləri Cəbhəsi İranda mövcud dini-siyasi sistemə qarşı çıxan və hökumətə müxalif mövqedə olan qruplaşma kimi tanınır. Hadisə ilə bağlı rəsmi qurumlar tərəfindən əlavə məlumat verilməyib.
23:31 07.01.2026
Oxunuş sayı: 1610
