Hadisə

İstanbulda Dünya Azərbaycanlılarının Həmrəylik Günü münasibətilə simpozium keçirilib

İstanbulda "Dünya Azərbaycanlılarının Həmrəylik Günü: Türkiyə-Azərbaycan geostrategiyası" mövzusunda simpozium keçirilib.

Crossmedia.az xəbər verir ki, tədbir “Karabakh is Azerbaijan” Milli Platformasının (KİAMP) Türkiyə Respublikası Baş Koordinatorluğu tərəfindən Beykoz Universitetinin dəstəyi ilə baş tutub.

Azərbaycan və Türkiyənin dövlət himnlərinin səsləndirilməsi ilə başlayan simpoziumda çıxış edən KİAMP-in Türkiyə üzrə baş koordinatoru Elvin Abdurahmanlı, Beykoz Universitetinin rektoru Burak Küntay və Naxçıvan Muxtar Respublikası Ali Məclisinin deputatı Üzeyir Məmmədov "Bir millət, iki dövlət” kəlamının yalnız bir şüar deyil, strateji tale birliyi kimi qiymətləndiriblər.

Natiqlər qeyd ediblər ki, ölkələrimiz arasındakı birlik Qarabağ Zəfəri ilə formalaşan geostrateji zəminə söykənərək bölgədə sülhün və Türk dünyasının gələcəyinin ən böyük təminatına çevrilib. Bu münasibətlərinin elmi və akademik platformalarda dərinləşməsi hər iki ölkənin ortaq gələcəyinə işıq tutacaq addımlardandır.

Tədbir panel iclaslarla davam etdirilib.

Panellərdən sonra türkdilli ölkələrdən və Pakistandan gələn tələbələr simpoziumun ana mövzusu olan "Türkiyə-Azərbaycan geostrateqiyası" çərçivəsində hazırladıqları məruzələrini təqdim edib, mövzuya baxışlarını iştirakçılarla bölüşüblər.