Hadisə

Ukraynanın Krivoy-Roq şəhərində Dünya Azərbaycanlıların Həmrəyliyi Günü qeyd edilib

Ukraynanın Dnepropetrovsk vilayətinin Krivoy-Roq şəhərində Dünya Azərbaycanlılarının Həmrəyliyi Günü münasibətilə tədbir keçirilib.

Crossmedia.az xəbər verir ki, Ukrayna Azərbaycanlıları Radası Krivoy-Roq şəhər təşkilatının rəhbərliyi ilə keçirilən tədbirdə rəsmi şəxslərlə yanaşı yerli ictimaiyyət nümayəndələri də iştirak ediblər.

Tədbirdə şəhər merinin vəzifəsini icra edən Yuri Vilkul bildirib ki, Azərbaycan diasporu Krivoy-Roq şəhərinin ictimai həyatında fəal rol oynayır. Müharibə şəraitinə baxmayaraq, bu gün də Azərbaycanın diaspor fəalları ukraynalılarla çiyin-çiyinə dayanaraq, öz humanitar missiyalarını uğurla davam etdirirlər. Yuri Vikul göstərdiyi huanitar yardıma görə, Azərbaycan dövlətinə təşəkkürünü bildirib.

Sonra Krivoy-Roq şəhərində Azərbaycan diasporunun rəhbəri Kəmaləddin Ağayev çıxış edərək bildirib ki, ən çox hava hücumlarına məruz qalan şəhərlərdən biri olan Krivoy-Roqda Dünya Azərbaycanlılarının Həmrəyliyi Gününün qeyd edilməsi Ukraynada yaşayan soydaşlarımızın birliyinin göstəricisidir.

“Dünya Azərbaycanlılarının Həmrəyliyi Gününün mahiyyətində xalqın birliyi dayanır. Bu gün diaspor fəallarımızın Ukraynanın çətin günündə bu günü qeyd etməsi xalqımızın birliyinin rəmzidir”, - deyə diaspor rəhbəri əlavə edib.

Daha sonra Ukraynanın Azərbaycandakı səfiri Yuri Qusev Ukraynada yaşayan Azərbaycan diasporunu Dünya Azərbaycanlılarının Həmrəyliyi Günü münasibətilə videotəbrik edib.

Tədbir çərçivəsində 100-ə yaxın uşağa bayram hədiyyəsi təqdim edilib.(AZƏRTAC)