“Sevgi Palitrası” adlı sərginin kuratoru: Bütün uşaqlar sevgi ilə böyüdülməlidir
“Sevgi Palitrası” adlı rəsm sərgisi daun sindromlu uşaqların qrup sərgisidir və bu sərgi Əlillər Gününə həsr olunub. Mədəniyyət Nazirliyi və Muzey Mərkəzinin dəstəyi ilə həyata keçirilən sərgidə uşaqların rəsm müəllimi Mahizər Sadıqlı çıxış edir və o, bu sərgini böyük sevgi ilə ərsəyə gətirib".
Bunu Crossmedia.az-a açıqlamasında “Sevgi Palitrası” adlı sərginin kuratoru və koordinatoru Ziyarət Cabbarova deyib.
O bildirib ki, sərgidə uşaqların 20 rəsm əsəri nümayiş olunur: "Bu rəsmlər 21 uşağın birgə əməyinin nəticəsidir. Bir rəsm əsərini isə bacı-qardaş çəkib. Sərgi müxtəlif qarışıq texnikalı əsərlərdən ibarətdir. Burada müxtəlif mövzulara aid rəsmlərə yer verilib. Daha çox təbiət və mənzərə mövzulu əsərlər nümayiş olunur; çiçəklər və heyvan təsvirləri də sərginin diqqət çəkən nümunələrindəndir. Al-əlvan palitrası ilə seçilən bu əsərlər daun sindromlu uşaqların sevgisini və onların qəlblərinin işığını özündə əks etdirir.
Sərgimizdə müxtəlif dövlət səviyyəli qonaqlar da iştirak edib. Bu sərgi vasitəsilə biz cəmiyyətə çatdırmaq istəyirik ki, heç kəsi fərqləndirmək lazım deyil. Bütün uşaqlar sevgi ilə böyüdülməli və sevgi ilə yanaşılmalıdır. Onların hər birinin daxili aləmini üzə çıxarmaq, cəmiyyətə göstərmək vacibdir. Uşaqlar bu əsərləri sevgi ilə yaradıblar. Ümumiyyətlə, bütün rəssamlar əsərlərini sevgi ilə yaradır, amma bu uşaqların rəsmlərinə diqqət etsək, xüsusilə al-əlvan rənglərin onların daxili işığını əks etdirdiyini görə bilərik.
Sərginin ideya müəllifi Mahizər Sadıqlı, təşkilatçısı Mədəniyyət Nazirliyi və Muzey Mərkəzi, koordinatoru isə mən — Ziyarət Cabbarova Qəhrəmanovayam".
Fatimə Nəzərli
23:34 29.11.2025
Oxunuş sayı: 933
