İşğaldan azad olunan ərazilərə köçürülən insanların məşğulluq siyasətinə ciddi diqqət göstərilir - Deputat
İşğaldan azad olunmuş ərazilərdə həyatın bərpası və əhalinin sosial rifahının təmin edilməsi istiqamətində görülən tədbirlər artıq konkret nəticələr verməkdədir. Dövlət Məşğulluq Agentliyinin məlumatına görə, bu bölgələrdə məşğulluq səviyyəsi 92 faizdən yuxarıdır ki, bu da “Böyük Qayıdış” proqramının effektiv icrasının göstəricisi kimi qiymətləndirilir. Agentliyin İdarə Heyətinin sədri Sadiq Əliyevin bildirdiyinə görə, köç prosesi başlamazdan əvvəl hər bir vətəndaşın peşə bacarıqları dəqiq müəyyən edilir, daha sonra isə işəgötürənlər tərəfindən təqdim olunan vakansiyalar əsasında onların həmin ərazilərdə məşğulluğu təmin olunur.
Bu yanaşma həm bölgələrdə iqtisadi fəallığın artmasına, həm də sakinlərin öz doğma yurdlarına daha möhkəm bağlanmasına və rahat uyğunlaşmasına şərait yaradır və ümumilikdə bölgələrin dayanıqlı inkişafına mühüm töhfə verir.
Məsələ ilə bağlı Milli Məclisin deputatı Məlahət İbrahimqızı Crossmedia.az-la öz fikirlərini bölüşüb:
"Böyük Qayıdış proqramı ümumiyyətlə çox ciddi şəkildə nəzərdə tutulmuşdur. Təsəvvür edin, Şuşaya, Zəngilana, Laçına və Füzuliyə nə qədər insan köçürülüb. Məsələn, istifadəyə verilmiş hava limanlarında nə qədər işçiyə ehtiyac var? Bu işçilərin böyük əksəriyyəti Bakıdan deyil, məhz həmin ərazilərdə yaşayan yerli insanlardır – Füzuli, Zəngilan, Las və Xudafərin kimi bölgələrdə məskunlaşmış sakinlər ilk növbədə işlə təmin olunur.
Eyni zamanda, açılmış məktəblərdə də belədir. Bir neçə məktəb qardaş türk dövlətlərinin hədiyyəsi olaraq istifadəyə verilib və orada işləyəcək kadrların əksəriyyəti məhz həmin bölgədə yaşayan keçmiş məcburi köçkünlərdir.
Bundan əlavə, torpağa malik olan insanlara da xüsusi diqqət göstərilir. Məsələn, əgər bir ailənin üzvünün təhsili varsa – tibb, müəllimlik və ya digər sahələr üzrə – onlara uyğun iş yerləri yaradılır. Eyni zamanda hər bir ailəyə torpaq sahəsi verilir ki, onlar öz həyatlarını təmin etmək üçün ev təsərrüfatı ilə, heyvandarlıq, bitkiçilik və ya quşçuluqla məşğul ola bilsinlər".
Deputat həmçinin Azərbaycan Respublikasının, dövlətimizin və Prezidentimizin rəhbərliyi ilə işğaldan azad olunmuş ərazilərdə Böyük Qayıdış layihəsi təkcə evlərin tikilməsi və məcburi köçkünlərin köçürülməsi ilə məhdudlaşmadığını qeyd edib:
"Layihə onların tam yaşayışını təmin edir: səhiyyə və tibb xidmətləri, təhsil, uşaqların və ailələrin öyrənmə imkanları, sosial problemlərin həlli və müraciət yolları, hətta asan və dost xidmətlərin yaradılması nəzərdə tutulub.
Bununla yanaşı, həmin bölgələr qaz, elektrik enerjisi və digər infrastrukturla təmin olunur, hüquq mühafizə orqanları yerləşdirilir və müxtəlif iş yerləri açılır ki, bu da yerli əhalinin məşğulluq probleminin həllinə yönəlib.
Bu baxımdan, əminəm ki, işğaldan azad olunmuş ərazilərdə məskunlaşmış insanların böyük əksəriyyətinin işlə təmin olunması artıq reallıqdır".
Elmir Heydərli
21:25 29.11.2025
Oxunuş sayı: 6240
