Ramiz Mehdiyevlə əlaqəli qüvvələrin yenidən ortaya çıxmaq istəyi ciddi şəkildə izlənilir- Deputat
Azərbaycan Xalq Cəbhəsi Partiyasının sədri Əli Kərimlinin evində axtarış aparılıb.
Dövlət Təhlükəsizliyi Xidmətində Əli Kərimli barəsində araşdırma ilə bağlı onun yaşadığı mənzildə axtarış aparılıb, lakin o, saxlanılmayıb.
Əli Kərimli barəsində araşdırma Prezident Adminstrasiyasının sabiq rəhbəri Ramiz Mehdiyevin cinayət işi çərçivəsində aparılır.
Xatırladaq ki, oktyabrın 14-də Bakı şəhəri Səbail Rayon Məhkəməsi Ramiz Mehdiyev barədə cinayət işi üzrə qərar qəbul edib.
Məhkəmə xüsusilə ağır cinayət əməllərinə görə cinayət məsuliyyətinə cəlb edilmiş R.Mehdiyev barədə verilmiş vəsatəti təmin edərək 4 ay müddətinə ev dustaqlığı qətimkan tədbiri seçib.
O Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunur.
Bu barədə Crossmedia.az-a danışan Milli Məclisin deputatı Naqif Həmzəyev bildirib ki, Rusiya-Ukrayna münaqişəsinin gələcək perspektivləri regional güc balansında ciddi dəyişikliklərə səbəb ola biləcək amillərdən biridir: “Təhlilçilərin qeyd etdiyi kimi, münaqişədən sonrakı dövrdə Rusiyanın Cənubi Qafqaz regionunda öz nüfuz dairəsini yenidən qurmaq cəhdləri gözlənilir. Bu strategiya regiondaki kiçik və orta ölçülü dövlətlər üçün yeni təhdidlər yarada bilər. Azərbaycan yaranmış geosiyasi vəziyyətdə öz müstəqil xəttini qorumağı bacaran azsaylı ölkələrdəndir. Azərbaycanın enerji sahəsində Avropa İttifaqı ilə əməkdaşlığının genişlənməsi, həmçinin mühüm regional layihələrdə aparıcı rol alması ölkəmizin müstəqil xarici siyasət kursunun təzahürüdür. Bu amil bizi regionda geosiyasi proseslərdən asılı olmayan sabit güc mərkəzinə çevirir. Təhlükəsizlik qurumlarının son araşdırmaları da göstərir ki, regionda gərginlik artdıqca müxtəlif siyasi qrupların aktivləşdirilməsi cəhdləri də müşahidə olunur. Ramiz Mehdiyevlə əlaqəli qüvvələrin yenidən ortaya çıxmaq istəyi və bəzi müxalif strukturların bu prosesdə rol alması təhlükəsizlik orqanları tərəfindən ciddi şəkildə izlənilir. AXCP-nin uzun illər radikal ritorikaya əsaslanan xətti, beynəlxalq platformalarda Azərbaycanın mövqeyinə qarşı çıxışlar, həmçinin regional əməkdaşlıq layihələrinə qeyri-konstruktiv yanaşma milli maraqlara zidd addımlar kimi dəyərləndirilir. Müasir təhlükəsizlik konsepsiyalarında əsas prinsip təhdidlərin qarşısının vaxtında alınmasıdır.Xarici güc mərkəzlərinin daxili qüvvələrdən istifadə etməsi bütün regionlarda rast gəlinən üsuldur. Azərbaycan kimi strateji mövqedə yerləşən dövlət üçün isə bu risklər daha həssasdır. Daxili sabitlik, qanunun aliliyi və təhlükəsizlik strukturlarının çevik fəaliyyəti dövlətçilik baxımından həlledici əhəmiyyət kəsb edir”.
N. Həmzəyev həmçinin vurğulayıb ki, dünya təcrübəsində dövlətlər milli təhlükəsizliyə yönələn təsir cəhdlərinə qarşı ciddi mexanizmlər tətbiq edirlər:
“Avropa ölkələri və ABŞ-da xarici müdaxilə risklərinə qarşı sərt hüquqi çərçivələr mövcuddur. Bu praktika göstərir ki, suverenliyin qorunması yalnız hüquqi deyil, eyni zamanda institusional tədbirlərin güclü işləməsini tələb edir. Azərbaycanın qarşısında dayanan geosiyasi çağırışlar kompleks və ardıcıl strategiya tələb edir. Regional və qlobal arenada mövqelərimizin möhkəmləndirilməsi, daxili sabitliyin qorunması və hüquqi dövlət prinsipinə sadiqlik Azərbaycanın uzunmüddətli strategiyasının əsas sütunlarıdır. Hazırda aparılan araşdırmalar və hüquqi proseslər dövlətin təhlükəsizlik mexanizmlərinin effektiv işlədiyini və milli maraqların qəti şəkildə qorunduğunu göstərir.”
Deputat, həmçinin AXCP-nin partiyaların birgə bəyanatlarından kənar qaldığını bildirib:
“Son dövrlər siyasi partiyalar arasında dialoq güclənib, bir çox partiyalar mühüm məsələlərdə birgə bəyanatlarla çıxış edirlər. Təəssüf ki, AXCP bu proseslərdən kənarda qalıb. Hətta ümummilli mövzularda da birgə bəyanatlara qoşulmayıb və dövlətin əldə etdiyi uğurlara qarşı əks mövqe nümayiş etdirib”.
Fatimə Hacıəliyeva
20:54 29.11.2025
Oxunuş sayı: 1765
