Kirayə qiymətləri niyə bahalaşır - Ekspert açıqladı
Bu gün ölkənin əmlak sektorunda ən çox müzakirə olunan məsələlərdən biri kirayə qiymətlərinin sürətlə bahalaşmasıdır. Artıq təkcə yerli sakinlər yox, ölkəmizə qısa və uzun müddətli səfər edən turistlər də yaşayış xərclərinin kəskin artmasından narazılıq edirlər. Məsələ ondadır ki, kirayə bazarında baş verən bahalaşma təsadüfi bir proses deyil və cəmiyyət arasında “sahibkarların şəxsi istəyi” kimi qavranılsa da, əslində qiymət artımını şərtləndirən bir sıra ciddi amillər mövcuddur. Bəs kirayə qiymətlərinin yüksəlməsinə konkret olaraq hansı faktorlar təsir edir? Bu artım bazarın öz daxili qanunauyğunluğundan qaynaqlanır, yoxsa doğrudan da bəzi ev sahibləri fürsətdən istifadə edərək qiymətləri şişirdirlər?
Mövzu ilə bağlı İş Adamları Cəmiyyətinin Milli Assosiasiyasının üzvü, əmlak eksperti Cahid Quliyev Crossmedia.az-a açıqlama verib:
Kirayə qiymətlərinin kəskin artmasının bir neçə səbəbləri var. Son illər Bakıya Ukrayna, Rusiya və s. ölkələrdən müvəqqəti işçi və tələbə axını gəlir və bu qrup adətən kirayə götürür. Kirayə evlərə tələb artır, qiymət də qalxır. Mənzil qiymətlərinin bir qisim əhali üçün əlçatan olmadığı üçün alışdan çox kirayəyə yönəlir və nəticədə tələb artır qiymət yüksəlir. Bundan əlavə paytaxtımızda turizm potensialının artması səbəbi ilə mənzil sahibləri yüksək gəlir əldə etmək üçün daha çox gündəlik kirayəyə üstünlük verirlər. Bu səbəbdən kirayə mənzil sayı azalır və bu da qiymətlərin artlmına səbəb olur.
Ekspert digər səbəbləri də qeyd edib: “Tikinti materiallarının və işçi qüvvəsinin bahalaşması mənzil qiymətlərinin və dolayısı ilə kirayə qiymətlərinin artmasına səbəb olur.Bakıda həyata keçirilən genişmiqyaslı söküntü işləri də kirayə mənzil tələbatını artıran əsas faktorlardan biridir”.
Ayhan
17:00 29.11.2025
Oxunuş sayı: 1567
