Ermənistan artıq baş nazir səviyyəsində yeni konstitusiyanın qəbul ediləcəyini bəyan edib - Deputat
Ermənistanda Konstitusiya islahatları son illərin ən çox müzakirə olunan siyasi proseslərindən biri kimi diqqət çəkir. Hakimiyyətin idarəetmə modeli, dövlət institutlarının səlahiyyət bölgüsü və ölkənin gələcək siyasi arxitekturası ilə bağlı müxtəlif siyasi qüvvələr və ictimai dairələr arasında davam edən debatlar bu mövzunu gündəmin ön sırasına çıxarıb. Rəsmi İrəvanın islahatlara xüsusi önəm verdiyi şəraitdə hökumətin açıqlamaları yeni Konstitusiya layihəsi üzərində işlərin intensivləşdiyini göstərir.
Məhz bu fonda ədliyyə naziri Srbui Qaluyanın yeni Konstitusiya mətninin hazırlanma vaxtı ilə bağlı son bəyanatı ölkə daxilində siyasi proseslərin gedişatı barədə mühüm siqnal kimi qiymətləndirilir. İslahatlar üzrə yaradılmış xüsusi komissiyanın fəaliyyəti, gözlənilən dəyişikliklərin miqyası və onların Ermənistanın dövlət idarəçiliyinə təsiri barədə suallar isə gündəmdə öz aktuallığını qorumaqda davam edir.
Məsələ ilə bağlı Milli Məclisin deputatı Hikmət Babaoğlu Crossmedia.az-la öz fikirlərini bölüşüb:
"Ermənistan artıq baş nazir səviyyəsində yeni konstitusiyanın qəbul ediləcəyini bəyan edib. Yeni konstitusiyanın mətninin müxtəlif formalarda əsaslandırılmasına baxmayaraq, Azərbaycanın gözləntiləri və tələbləri bu kontekstdə hamı üçün aydındır. Bu baxımdan, Ermənistanın konstitusiyasında Azərbaycana qarşı ərazi iddialarının tam şəkildə çıxarılması mütləq və zəruri şərtdir.
Konstitusiya layihəsinin mart ayına qədər hazırlanmasına gəldikdə, görünür ki, Ermənistan qanunvericiliyində də – bizim qanunvericilikdə olduğu kimi – layihənin ən azı üç ay ictimai müzakirələrə təqdim olunması tələbi mövcuddur. Yalnız bu mərhələdən sonra islahatın həyata keçirilməsi mümkün olur. Mart ayının sonlarından iyunun sonuna qədər olan dövrün həmin üç aylıq müzakirə müddətinə uyğun gəlməsi mümkündür. Buna görə də görünür ki, seçkilərdən dərhal sonra yeni konstitusiya layihəsinin ictimai müzakirəyə çıxarılması ehtimalı yüksəkdir".
Deputat həmçinin seçkilərin tarixinin dəyişdirilməsi və referendumun iyun ayına keçirilməsi variantı da istisna edilmədiyini bildirib:
"Bu barədə yekun qərarı, yəqin ki, Ermənistanda siyasi qərarvericilər qəbul edəcəklər. Lakin bütün hallarda sülhün təmin olunması üçün atılan bu addım artıq Ermənistanda da zəruri bir proses kimi dəyərləndirilir".
Elmir Heydərli
23:56 28.11.2025
Oxunuş sayı: 914
