ŞAD XƏBƏR: Zəngəzur dəhlizində tikinti yekunlaşır, yol açılır
Zəngəzur dəhlizinin Naxçıvandan keçən dəmir yolu xəttinin bərpası üzrə layihələndirmə işləri yekunlaşıb və yaxın günlərdə tikintiyə start veriləcək. Rəqəmsal inkişaf və nəqliyyat naziri Rəşad Nəbiyevin sözlərinə görə, Azərbaycan təxminən 200 km-lik bu magistralın bərpasını həyata keçirmək üzrədir və proses fəal şəkildə davam etdirilir. Bu layihənin reallaşması regionun nəqliyyat əlaqələrini gücləndirəcək və Azərbaycan üçün strateji üstünlük yaradacaq. Naxçıvanın birbaşa dəmir yolu ilə ölkəyə bağlanması logistik imkanları genişləndirəcək və yükdaşımada böyük dinamika yaradacaq. Ümumilikdə, Zəngəzur dəhlizi regionda iqtisadi inteqrasiyanı daha da sürətləndirəcək.
Baş verən proseslərlə bağlı deputat Tural Gəncəliyev Crossmedia.az-a açıqlama verib. O bildirib ki, Zəngəzur dəhlizinin Azərbaycan hissəsində işlər tamamlanmaq üzrədir və Ermənistan öz öhdəliklərini yerinə yetirdiyi halda regionda yeni əməkdaşlıq mərhələsi başlayacaq: "Artıq Azərbaycanın Naxçıvanla birləşdirəcək Zəngəzur dəhlizinin Azərbaycan hissəsində yekunlaşma işləri sona çatmaq üzrədir. Azərbaycan bu istiqamətdə böyük nailiyyətlər əldə edib. Çünki biz əvvəlcədən bu dəhlizin funksional olmasının vacibliyini bilirdik və infrastruktur-quruculuq işlərini üzərimizə düşən şəkildə tamamlayırıq.
Təbii ki, indi top Ermənistan tərəfindədir. Ermənistan öz öhdəliklərini qısa zamanda yerinə yetirməlidir. Əgər Ermənistan 2020-ci il müharibəsi bitdikdən dərhal sonra hərəkətə keçsəydi, bu gün Zəngəzur dəhlizinin tam funksional olması mümkün idi. Təəssüf ki, Ermənistanın tərəddüdləri müəyyən gecikmələrə səbəb oldu.
Azərbaycan və Orta Dəhlizin açılmasında maraqlı olan bütün tərəflər öz işlərini görüb. Ermənistan öhdəliklərini yerinə yetirdikdən sonra regionda yeni əməkdaşlıq imkanlarının güclənməsi müşahidə olunacaq və orta dəhlizin önəmi daha da artacaq. Orta dəhliz hazırda dünyanın əsas strateji kommunikasiya arteriyalarından biri hesab olunur və Azərbaycan üçün ciddi strateji, geosiyasi və geoiqtisadi əhəmiyyət daşıyır".
Ülvi Zahidov
12:20 27.11.2025
Oxunuş sayı: 1314
