Ermənistan parlamentinin sədri Azərbaycana gəlir: Müzakirə olunacaq mövzular açıqlandı - Deputat
Regionda diplomatik canlanma hiss olunur. Ermənistan parlamentinin spikeri Alen Simonyanın Azərbaycana səfərə hazır olduğunu bildirməsi, həmçinin Milli Məclisin sədri Sahibə Qafarovanın İrəvana mümkün gəlişinin gündəmə gəlməsi iki ölkə arasında siyasi dialoq imkanlarının real şəkildə yenidən formalaşa biləcəyinə işarə edir. Bu qarşılıqlı niyyət bəyanatları tərəflər arasında etimad mühitinin qurulması baxımından mühüm addım kimi qiymətləndirilir. Alen Simonyanın “Azərbaycan’a getməyə hazıram” açıqlaması iki dövlət arasında nəyi ifadə edir? Simonyanın Sahibə Qafarovanı Ermənistana dəvət etmək niyyəti iki ölkə arasında ‘’yumşaq diplomatiya”nın başlanğıcı ola bilərmi?
Mövzu ilə bağlı Milli Məclisin deputatı Aydın Hüseynov Crossmedia.az saytına açıqlama verib. O bildirib ki, Azərbaycanın bu mövzuda heç bir problemi yoxdur, problem Ermənistan tərəfindədir: “Azərbaycan öz sülh təşəbbüsünü Ermənistanın kapitulasiya etdiyi gündən təqdim edib. Azərbaycanın irəli sürdüyü prinsiplər qəbul olunsa, bu, bölgədə dayanıqlı sülhün əsasını qurar. Eyni zamanda, sülh Ermənistan üçün daha vacibdir. Buna görə də Ermənistan öz dövlətinin çıxılmaz siyasətini kənara qoymalı, düzəlişlər etməlidir. Yəni sülhə ilk addımı Ermənistan atmalıdır. Azərbaycanın təklif etdiyi prinsipləri, o cümlədən Konstitusiyasında lazım olan dəyişiklikləri həyata keçirməlidir. Qonşulara, xüsusən Azərbaycana qarşı olan ərazi iddialarından tamamilə imtina etməlidir. Ancaq bundan sonra dayanıqlı sülhdən danışmaq mümkündür”.
Deputat bildirib ki, digər tərəfdən, Azərbaycan artıq bir çox razılaşmalar əldə edib: “Son günlərdə Azərbaycanın qeyri-hökumət təşkilatlarının və cəmiyyət nümayəndələrinin İrəvana, Ermənistan QHT-lərinin isə Bakıya səfərləri baş tutub. Bu da müsbət hal kimi qiymətləndirilməlidir. Ermənistan parlament sədrinin Azərbaycana gəlmək istəyi və eyni zamanda Azərbaycan spikerini Ermənistana dəvət etməsi məsələsinə gəldikdə isə, Azərbaycan bu dəvəti hansı formada, necə qəbul edəcək bu, ayrıca bir mövzudur. Çünki Azərbaycanın dövlətçilik maraqları və milli maraqları var. Azərbaycan artıq həm regionda, həm də dünyada nüfuz sahibi olan bir dövlətdir. Sonda onu demək olar ki, proseslərin necə davam edəcəyi, sülhün reallaşması Ermənistanın atacağı addımlardan və səmimiliyindən çox asılı olacaq. Onların konkret və ardıcıl addımları vəziyyəti müəyyən edəcək’’.
Sevinc Yarməmmədova
16:17 26.11.2025
Oxunuş sayı: 1821
