Gündəm

Küveytdə Zəfər Gününün beşinci ildönümü münasibətilə mərasim təşkil edilib

Azərbaycanın Küveytdəki səfirliyində 8 Noyabr - Zəfər Gününün beşinci ildönümü münasibətilə tədbir keçirilib.

Crossmedia.az xəbər verir ki, tədbirdə Türkiyə, Pakistan, Şimali Kiprin səfirləri, BMT-nin Məskunlaşma Proqramının (UN-Habitat) rəhbəri və onun müavini, Küveyt Elektron Birliyinin İdarə Heyətinin sədri, eyni zamanda, Elektron Media və Davamlı İnkişaf üzrə Ərəb Birliyinin Qəyyumlar Şurasının və İdarə Heyətinin sədri, dost ölkələrin diplomatları, habelə bu ölkədə yaşayan və çalışan Azərbaycan icmasının təmsilçiləri, Küveyt Dövlət Universitetində təhsil alan azərbaycanlı tələbələr, yerli ictimaiyyətin nümayəndələri iştirak ediblər.

Əvvəlcə Azərbaycanın Dövlət Himni səsləndirilib və ölkəmizin ərazi bütövlüyü uğrunda mübarizədə şəhid olanların xatirəsi bir dəqiqəlik sükutla anılıb.

Səfir Emil Kərimov Prezident, Ali Baş Komandan Prezident İlham Əliyevin rəhbərliyi ilə şanlı Azərbaycan Ordusunun 44 günlük müharibədə qazandığı Zəfərin tarixindən danışıb, 2020-ci il noyabrın 8-nin Azərbaycanın müasir tarixinə şanlı Zəfər Günü kimi daxil olduğunu vurğulayıb.

Diplomat 44 günlük Vətən müharibəsi ərzində Azərbaycanın torpaqlarını 30 illik işğaldan azad etməklə təkcə özünün ərazi bütövlüyünü deyil, həmçinin tarixi ədaləti bərpa etdiyini, beynəlxalq hüququn norma və prinsiplərini yerinə yetirdiyini diqqətə çatdırıb.

O, həmçinin ölkəmizin bütün əraziləri üzərində dövlət suverenliyimizin tam bərpası ilə nəticələnmiş antiterror tədbirlərinə toxunub. Həmçinin Ermənistan tərəfindən işğal dövründə basdırılmış mina təhlükəsinin hələ də qaldığını bildirib.

Qeyd olunub ki, Azərbaycan bölgədə sabitliyin təmin edilməsi və Ermənistanla münasibətlərin normallaşdırılması məqsədilə 5 baza prinsipini təqdim edib, sülh gündəliyinin irəliyə aparılması üçün siyasi iradə və konstruktiv mövqe sərgiləyib.

Eyni zamanda, diqqətə çatdırılıb ki, bu ilin avqustunda Vaşinqtonda ABŞ Prezidentinin vasitəçiliyi ilə Azərbaycan Prezidenti və Ermənistanın Baş nazirinin Birgə Bəyannamə imzalamaları, iki ölkə arasında sülh sazişinin paraflanması regionda uzunmüddətli sülhün və sabitliyin təmin edilməsinə töhfədir. Vurğulanıb ki, əldə edilmiş razılaşmalara uyğun olaraq reallaşacaq Zəngəzur dəhlizi qitələri birləşdirən mühüm nəqliyyat bağlantısına çevriləcək.

Diplomat, həmçinin Prezident İlham Əliyevin Sərəncamı ilə 2025-ci il “Konstitusiya və Suverenlik İli” elan edildiyini xatırladıb.

Tədbirdə çıxış edən Türkiyənin səfiri xanım Tuba Nur Sönməz, Pakistan səfiri Zəfər İqbal, Şimali Kiprin səfiri Atınc Keskin Azərbaycan xalqını Zəfər Günü münasibətilə təbrik edib, ölkəmizin regionda sülhün və sabitliyin bərqərar olması, həmçinin inkişaf yolunda atdığı bütün addımları dəstəklədiklərini bildiriblər.(AZƏRTAC)