Rusiya-Ukrayna savaşı uzanır: Üfüqdə sülh görünmür
Ukraynada 2022-ci ildən davam edən müharibə artıq təkcə iki dövlətin qarşıdurması deyil, həm də qlobal geosiyasi balansı müəyyən edən əsas amillərdən birinə çevrilib. Münaqişənin uzanması beynəlxalq təhlükəsizlik sistemində gərginliyi artırmaqla yanaşı, iqtisadi və humanitar fəsadlarını da dərinləşdirib. Belə bir şəraitdə Rusiya və Qərb dairələrindən səslənən hər bir sülhə yönəlik bəyanat dünya ictimaiyyətinin diqqət mərkəzinə düşür.
Son günlər bu kontekstdə səslənən ən maraqlı açıqlamalardan biri Rusiya Prezidenti Vladimir Putinin xarici ölkələrlə investisiya və iqtisadi əməkdaşlıq üzrə xüsusi nümayəndəsi Kirill Dmitriyevə məxsusdur. O, Səudiyyə Ərəbistanında keçirilən “Future Investment Initiative 2025” konfransında çıxışı zamanı Ukraynada müharibənin bir il ərzində başa çatacağına ümid etdiyini bildirib. Dmitriyev qeyd edib ki, “Rusiya sülhə aparan yoldadır və bu istiqamətdə mümkün olan bütün addımlar atılmalıdır”.
Xüsusi nümayəndənin bu bəyanatı Rusiya tərəfinin son dövrlər münaqişənin diplomatik yolla həlli barədə səsləndirdiyi siqnalların davamı kimi qiymətləndirilir. O, həmçinin vurğulayıb ki, Moskva və Vaşinqton arasında müharibənin diplomatik yolla dayandırılması istiqamətində müəyyən yaxınlaşma müşahidə olunur.
Ekspertlərin fikrincə, bu cür bəyanatlar müharibə ilə bağlı optimizmin formalaşmasına səbəb olsa da, real vəziyyət hələlik sülh danışıqlarının başlanması üçün yetərincə zəmin yaratmır. Çünki həm Rusiya, həm də Ukrayna tərəfi qarşılıqlı güzəştlərə hazır olduqlarını praktiki addımlarla təsdiqləməyiblər. Bununla belə, beynəlxalq iqtisadi forumda səslənən bu cür mesajlar gələcək diplomatik proseslər üçün müəyyən siyasi fon yaradır və tərəflərin mövqelərinin yumşalması istiqamətində ilk işarələr kimi qiymətləndirilə bilər.
Məsələ ilə bağlı politoloq İlqar Vəlizadə Crossmedia.az-la öz fikirlərini bölüşüb:
"Hazırda bu mövzu ətrafında müxtəlif rəsmi bəyanatlar, açıqlamalar və qiymətləndirmələr səsləndirilir. Kimi ümid edir ki, müharibə tezliklə başa çatacaq, kimi isə danışıqların yaxın zamanda başlanacağına inanır. Yəni, ümidlər çoxdur, fikirlər müxtəlifdir. Əlbəttə, rəsmi şəxslər ictimaiyyətə müraciət edərkən, təbii olaraq, ümidverici mesajlar verməyə çalışırlar.
Təsəvvür edək ki, Prezidentin köməkçisi və ya iqtisadi məsələlərə baxan bir rəsmi şəxs “müharibənin uzanmasını gözləyirik, heç bir ümid yoxdur” kimi bəyanat versəydi — bu, həm ictimai rəy baxımından mənfi təsir doğurar, həm də beynəlxalq arenada müəyyən siyasi siqnal kimi qəbul edilərdi. Bu mənada Rusiyanın bəzi bəyanatları da göstərir ki, müharibənin davam etməsinə maraq mövcuddur və prosesin uzanacağı ehtimalı proqnozlaşdırılır.
Lakin bu cür açıqlamaların əksəriyyəti ümumi xarakter daşıyır və konkret proqnoz verməyə əsas yaratmır. Əgər bu bəyanatlar konkret plan və ya əməli addımlarla müşayiət olunsaydı, yaxın perspektivdə müəyyən nəticələr barədə fikir söyləmək mümkün olardı".
Politoloq, həmçinin hazırkı vəziyyətdə müharibənin uzanması ehtimalı yüksək olduğunu qeyd edib:
"Bütün əlamətlər göstərir ki, münaqişənin sonu yaxınlaşmır, tərəflər isə döyüş əməliyyatlarının davam etməsinə hazırlaşırlar. Ukrayna Prezidenti Volodimir Zelenski də qeyd edib ki, ölkəsi hələ bir, iki, hətta üç il ərzində müharibəni davam etdirməyə hazırdır. Bu da onu göstərir ki, tərəflər ortaq məxrəcə gəlməyənə qədər hərbi ssenari hələlik ən real variant olaraq qalır".
Elmir Heydərli
14:54 30.10.2025
Oxunuş sayı: 1893
