Dələduzluğun yeni növü: Əvvəl saxta elan paylaşılır, sonra isə...- Hüquqşünas danışdı
Son illər xaricdə yüksək maaşlı iş vədləri ilə insanları aldatmaq halları artmaqdadır. Sosial şəbəkələrdə və müxtəlif onlayn platformalarda yayılan saxta elanlar vasitəsilə vətəndaşlardan böyük məbləğdə pul tələb olunur, nəticədə isə onlar həm maddi, həm də mənəvi zərər çəkirlər. Bu cür qanunsuz fəaliyyətlərlə məşğul olan şəxslərə qarşı hüquq-mühafizə orqanları mütəmadi olaraq tədbirlər görür. Məhz belə əməliyyat nəticəsində, Nəsimi Rayon Polis İdarəsinin 22-ci Polis Şöbəsinin əməkdaşları bir qrup şəxsi saxlayıb.
Mövzu ilə bağlı hüquqşünas Ramil Süleymanov Crossmedia.az-a danışıb. O bildirib ki, Daxili İşlər Nazirliyi bu addımı atmaqda tələskənlik edib: ‘’Hazırda təqsirləndirilən şəxs statusunda olan şəxslərdən birinin vəkili kimi qeyd etmək istəyirəm ki, onların təqsiri hələ sübuta yetirilmədən Daxili İşlər Nazirliyi tərəfindən təqsirsizlik prezumpsiyası prinsipi pozulub. Bu isə gələcəkdə həmin şəxslərin hüquqlarının bərpası baxımından mühüm əhəmiyyət kəsb edən məsələdir’’.
Hüquqşünas qeyd edib ki, vətəndaşların gələcəkdə oxşar hallarda aldanmamasına görə əsas məsuliyyət onların üzərinə düşür: ‘’Belə ki, hər hansı şirkət və ya fərdlə əməkdaşlıq etməzdən əvvəl həmin şəxslərin və şirkətlərin legitimliyini yoxlamalı, fəaliyyətlərinin qanuni əsaslara söykəndiyinə əmin olmalıdırlar. Bundan sonra vətəndaşlar müvafiq müqavilə bağlayaraq, yalnız qanunla müəyyən edilmiş qaydada addım atmalıdırlar’’.
Sevinc Yarməmmədova
20:43 29.10.2025
Oxunuş sayı: 2652
