AZAL: Uçuşun maksimal təhlükəsizliyini təmin etmək məqsədilə təyyarə eniş edib
"Uçuşun maksimal təhlükəsizliyini təmin etmək məqsədilə “Azerbaijan Airlines” aviaşirkətinə məxsus Airbus A320 tipli təyyarənin kapitanı, Sankt-Peterburq – Bakı marşrutu ilə həyata keçirilən J2-020 reysi zamanı, şassi ilə bağlı texniki səbəbə görə geri qayıdaraq Pulkovo hava limanına eniş etməyə qərar verib".
Crossmedia.az xəbər verir ki, bu barədə Azərbaycan Hava Yolları məlumat yayıb.
Məlumata görə, təhlükəsizlik prosedurlarına tam əməl olunması üçün ekipaj bütün zəruri tədbirləri diqqətlə yerinə yetirib, o cümlədən enişdən əvvəl yanacağın sərf edilməsini təmin edib.
Müvafiq qaydalara əsasən, Sankt-Peterburq hava limanında bütün qəza-xilasetmə xidmətləri yüksək hazırlıq vəziyyətinə gətirilib. Təyyarə Bakı vaxtı ilə saat 04:43-də Pulkovo hava limanına uğurla enib.
Eniş zamanı hava gəmisinin uçuş-enmə zolağını bir qədər kənara çıxması qeydə alınıb. Bütün 155 sərnişin operativ şəkildə təxliyə olunub, xəsarət alan olmayıb.
Sankt-Peterburqdan Bakıya sərnişinlərin daşınması üçün artıq aviaşirkət tərəfindən başqa bir təyyarə göndərilib.
“Azerbaijan Airlines” sərnişinlərə təmkin və anlayışlarına görə təşəkkürünü bildirir, həmçinin Pulkovo hava limanının xidmətlərinə peşəkar və koordinasiyalı fəaliyyətlərinə görə minnətdarlığını ifadə edir.
10:38 20.10.2025
Oxunuş sayı: 1051
