2026-cı il büdcəsində Qarabağ və Şərqi Zəngəzurun bərpası prioritet olaraq qalır - Deputat
Azərbaycan Respublikasının 2026-cı il dövlət büdcəsi layihəsində işğaldan azad olunmuş ərazilərin yenidən qurulması və bərpası yenə də əsas istiqamətlərdən biri kimi müəyyənləşdirilib. Qanun layihəsinə əsasən, gələn il bu məqsədlərə 3,5 milyard manat, yəni ümumi büdcə xərclərinin 8,4 faizi ayrılacaq.
Bu göstərici 2025-ci ilin təsdiq olunmuş proqnozu ilə müqayisədə 12,5 faiz az olsa da, Qarabağ və Şərqi Zəngəzurda genişmiqyaslı bərpa və inkişaf layihələrinin davam etdirilməsi üçün mühüm maliyyə təminatı kimi qiymətləndirilir. Ümumilikdə, 2026-cı ildə dövlət büdcəsinin gəlirlərinin 38 milyard 609 milyon manat, xərclərinin isə 41 milyard 703,6 milyon manat olacağı gözlənilir.
Bu rəqəmlər Azərbaycanın iqtisadi siyasətində postmünaqişə dövrü yenidənqurma proseslərinin hələ də prioritet mövqedə olduğunu göstərir.
Bu barədə Crossmedia.az-a danışan Milli Məclisin deputatı Naqif Həmzəyev bildirib ki, 3,5 milyard manatlıq ayrılma ilk növbədə əsas infrastrukturun — yollar, körpülər, elektrik və su təchizatı, rabitə xətləri, məktəblər və xəstəxanalar kimi həyati vacib obyektlərin tikintisini və bərpasını sürətləndirir: “Bu investisiyalar regionun iqtisadi həyatının bərpası üçün baza yaradır. İnfrastruktur layihələri yeni iş yerlərinin açılmasına, kiçik və orta biznesin inkişafına, tikinti və xidmət sektorlarında məşğulluğun artmasına şərait yaradır. Bütün bunlar yerli iqtisadiyyatın canlanmasına ciddi təkan verir".
N.Həmzəyev əlavə edib ki, yenidənqurma işləri əhalinin təhlükəsiz və layiqli şəraitdə doğma yurdlarına qayıtması üçün zəruri şəraiti formalaşdırır:
“Yaşayış evləri, sosial obyektlər və kommunal xidmətlər olmadan qaçqın və məcburi köçkünlərin qayıdışı mümkün deyil. Bu baxımdan dövlətin ayırdığı vəsait həm sosial, həm də strateji əhəmiyyət daşıyır".
Deputatın sözlərinə görə, bu investisiyalar eyni zamanda işğaldan azad edilmiş ərazilərin Azərbaycanın ümumi iqtisadi sisteminə inteqrasiyasına, yeni nəqliyyat və enerji dəhlizlərinin formalaşmasına, regional əməkdaşlığın inkişafına xidmət edir:
“Bu, uzunmüddətli iqtisadi və sosial inkişafın təməlini qoyur, həm də bərpa prosesinin sürətini və keyfiyyətini birbaşa müəyyən edir".
Mehriban Yariyeva
16:00 18.10.2025
Oxunuş sayı: 9154
