Ali Baş Komandan arxayın idi ki, Azərbaycan Ordusu bu tapşırığı qısa zamanda yerinə yetirəcək - General
Füzuli şəhəri Azərbaycan Respublikasının cənub-qərbində, Qarabağ bölgəsinin mühüm strateji mövqeyində yerləşir. Tarixən iqtisadi, mədəni və hərbi baxımdan əhəmiyyətli məkan kimi tanınan Füzuli, həm qədim dövrlərdən keçmiş ticarət yollarının kəsişməsində yerləşməsi, həm də təbii-coğrafi mövqeyi ilə seçilib. Şəhər həm Cəbrayıl, Xocavənd və Hadrut istiqamətlərinə, həm də Ermənistanla sərhəd ərazilərə yaxınlığına görə bölgənin nəqliyyat və təhlükəsizlik baxımından əsas mərkəzlərindən biri sayılır.
2020-ci il Vətən müharibəsində Füzuli şəhərinin azad olunması təkcə ərazi bütövlüyünün bərpası baxımından deyil, həm də regionun iqtisadi və strateji inkişafı üçün mühüm dönüş nöqtəsi oldu. Bu gün Füzuli azad edilmiş ərazilərin bərpası prosesində əsas logistik və kommunikasiya qovşağı kimi mühüm rol oynayır — burada beynəlxalq hava limanı, avtomobil yolları və yeni infrastruktur layihələri şəhərin strateji əhəmiyyətini daha da artırır.
Beləliklə, Füzuli şəhəri günü təkcə tarixi zəfərin xatirəsi deyil, həm də Azərbaycan dövlətinin gücünün, milli dirçəlişin və bölgənin gələcək inkişafının rəmzi kimi qeyd olunur.
Mövzu ilə bağlı istefada olan general-leytenant Yaşar Aydəmirov Crossmedia.az-a öz fikirlərini bölüşüb:
"Füzuli rayonunun işğaldan azad edilməsi zamanı göstərilən qəhrəmanlıq Azərbaycanın ən yüksək zirvəsidir.
Çoxsaylı döyüşlərin olmasının səbəbi, böyük şücaətlə komandirlərin hərbi məharətlərindən yüksək səviyyədə istifadə etmələridir. Həm də Ali Baş Komandan İlham Əliyev Füzulinin işğaldan azad olunmasına xüsusi diqqət yetirirdi. Orada elə işlər görülürdü ki, onları heç kimin ağlına gətirməsi belə çətin idi.
Azərbaycan Ordusunun dünyanın elit orduları sırasına daxil olması bəzilərini qısqanmağa vadar edir. Bu müharibə, xüsusilə Füzulinin azad olunması, bu gün bir çox hərbi məktəblərdə, akademiyalarda, informasiya agentliklərində və analitik mərkəzlərdə öyrənilir, təhlil olunur.
O ölkə sözünü deyə bilir ki, onun ordusu güclüdür. Azərbaycan bu müharibədən əvvəl də güclü siyasət yürüdür, diplomatik sahədə mühüm addımlar atırdı. Çünki ordusuna arxayın idi. Heç bir lokal müharibə bu qədər qısa zamanda və belə az itkilərlə başa çatmayıb. Ərazimizin əsasən dağlıq, meşəlik, keçilməz qayalıq olduğunu da nəzərə almaq lazımdır.
Unutmaq olmaz ki, Ali Baş Komandanın əmr verdiyi əks-hücum əməliyyatları payız vaxtı həyata keçirildi. O dövrdə bu, böyük risk idi hava şəraiti yağışlı, dumanlı olurdu. Amma Ali Baş Komandan arxayın idi ki, Azərbaycan Ordusu bu tapşırığı qısa zamanda yerinə yetirəcək.
Eyni zamanda Azərbaycana qarşı güclü informasiya müharibəsi gedirdi.
İnformasiya müharibəsində Prezident İlham Əliyev dünyanın bir çox ölkələrindən gələn müxbirlərə layiqli cavablar verirdi Almaniya, Fransa və digər dövlətlərin jurnalistlərinə olduğu kimi.
Çox xoş haldır ki, Azərbaycan xalqı da kütləvi informasiya vasitələrində düşmənə qarşı güclü informasiya müharibəsi aparırdı.
Bu gün də Ali Baş Komandanımız dünya hərb məharətinə elə bir töhfə verib ki, indi Azərbaycanın böyük ordusunun döyüş qabiliyyəti, tətbiq etdiyi metodlar, üsullar və silahların istifadəsi qaydaları müxtəlif ölkələrdə öyrənilir".
İstefada olan general bu gün xaricdən gələn qonaqların, beynəlxalq konfrans və mərasimlərdə iştirak edənlərin Azərbaycanın azad edilmiş ərazilərinə baxarkən heyran qaldıqlarını qeyd edib:
"Onlar görürlər ki, qısa zamanda müxtəlif rayonlarda və kəndlərdə geniş quruculuq işləri aparılıb, külli miqdarda vəsait ayrılıb. Hamıya məlumdur ki, həmin ərazilər çox minalanıb, lakin minaların təmizlənməsi prosesi də yüksək səviyyədə həyata keçirilir.
Tikilən obyektlər, yollar, su, elektrik və qaz xətləri öncədən planlaşdırılır və bu da prosesin sürətini artırır.
Bu yaxınlarda Zəngəzur dəhlizinə aparan yol istiqamətində də işlər sürətlə gedir və qısa zamanda tam hazır olacaq.
Bütün bunlar bizi sevənləri sevindirir, istəməyənləri isə qıcıqlandırır".
Türkanə Məşədiyeva
17:47 17.10.2025
Oxunuş sayı: 14303
