Kobaxidze: Heç bir ölkədə, o cümlədən Finlandiyada da qanunsuz aksiyada iştirak etməyəcəyəm
Gürcüstanın Baş naziri İrakli Kobaxidze bildirib ki, o, heç bir ölkədə, o cümlədən Finlandiyada da qanunsuz aksiyada iştirak etməyə niyyətli deyil.
Bu barədə Crossmedia.az Gürcüstan mediasına istinadən məlumat verir.
“Bilmirəm, o məni qanunsuz aksiyaya dəvət edir, ya yox – bu, onun işidir, amma mən heç bir ölkədə, o cümlədən Finlandiyada da qanunsuz aksiyada iştirak etməyəcəyəm,” – deyə Kobaxidze, ATƏT-in fəaliyyətdə olan sədri və Finlandiyanın xarici işlər naziri Elina Valtonenin onu Finlandiyaya səfərə və “istədiyi nümayişdə iştirak etməyə” dəvətini şərh edərkən bildirib.
Kobaxidzenin sözlərinə görə, cəmiyyət Finlandiyanın xarici işlər nazirinin diplomatik normaları pozmasının şahidi olub. Onun fikrincə, Valtonen Gürcüstana ATƏT adından səfər etsə də, öz hərəkətləri ilə ölkənin daxili siyasi proseslərinə müdaxilə edib.
Bundan əvvəl Kobaxidze Valtonenin Gürcüstana səfəri zamanı “qanunsuz aksiyada iştirakı” ilə əlaqədar 15 oktyabra planlaşdırılmış görüşü ləğv etmişdi. Daha sonra Gürcüstan Xarici İşlər Nazirliyi ATƏT-ə və iştirakçı dövlətlərə etiraz notası göndərib, Daxili İşlər Nazirliyi isə Valtoneni 5 min lari (təxminən 1,8 min dollar) məbləğində cərimələyib.
Mehriban İbrahimli
17:23 17.10.2025
Oxunuş sayı: 1829
