TDT-nin Qəbələdə keçirilmiş sammiti türk inteqrasiyasının yeni kursunu müəyyənləşdirdi - Qazaxıstan senatının sədri
Qəbələdə keçirilmiş Türk Dövlətləri Təşkilatına (TDT) üzv ölkələrin dövlət başçılarının 12-ci zirvə toplantısı türk inteqrasiyasının yeni istiqamətlərini müəyyənləşdirdi.
Crossmedia.az Qazaxıstan parlamentinin Senatına istinadən xəbər verir ki, bu barədə Senatın sədri Maulen Aşimbayev Qazaxıstanda rəsmi səfərdə olan Türk Dövlətləri Parlament Assambleyasının (TÜRKPA) baş katibi Ramil Həsənovla görüşü zamanı danışıb.
“Görüşümüz Qəbələdə keçirilmiş Türk Dövlətləri Təşkilatının sammitindən sonra baş tutur. Həmin zirvə toplantısı ölkələrimiz arasında yüksək səviyyəli qarşılıqlı əməkdaşlığı bir daha təsdiqlədi və türk inteqrasiyasının yeni kursunu müəyyənləşdirdi. Qazaxıstan Prezidenti Kasım-Jomart Tokayev sammit zamanı türkdilli xalqların mənəvi yaxınlığını xüsusi vurğuladı.
Dövlət başçısı qeyd etdi ki, türk xalqları ortaq tarixi köklərə malikdir və onları ümumi dəyərlər birləşdirir. Bütün bunlar bizim qardaşlığımızın və birliyimizin parlaq təzahürüdür. Əminəm ki, Qəbələ sammitinin nəticələri Parlament Assambleyası çərçivəsində əməkdaşlığın daha da möhkəmlənməsinə, razılaşdırılmış qanunverici yanaşmalarının işlənib hazırlanmasına və birgə layihələrin həyata keçirilməsinə təkan verəcək”, – deyə Aşimbayev bildirib.
Sədr vurğulayıb ki, Qazaxıstan, TÜRKPA-nın hazırkı sədri kimi, Assambleyanın türk dövlətləri və xalqlarının rifahına yönəlmiş təşəbbüslərini hərtərəfli şəkildə dəstəkləməyə hazırdır.
15:09 17.10.2025
Oxunuş sayı: 7325
