AMEA prezidenti: İkinci Qarabağ müharibəsindən sonra türk dövlətləri arasında birlik gücləndi
Azərbaycanın İkinci Qarabağ müharibəsində qazandığı qələbədən sonra türk dövlətləri arasında birliyə yönələn addımlar daha da sürətləndi.
Crossmedia.az xəbər verir ki, bunu Azərbaycan Milli Elmlər Akademiyasının (AMEA) prezidenti İsa Həbibbəyli oktyabrın 18-i Azərbaycanın Müstəqilliyinin Bərpası Günü və oktyabr 29-u Türkiyənin Cümhuriyyət Gününə həsr olunmuş "Azərbaycan və Türkiyə: tarixi əlaqələr, yeni qlobal çağırışlar" mövzusunda keçirilən beynəlxalq elmi-praktik konfransda deyib.
Onun sözlərinə görə, AMEA-nın yubileyi indiyədək cəmi üç dəfə qeyd olunub: "Biz dördüncü dəfə bu il Akademiyanın yubileyini keçiririk, bu dəfə 80 illiyimiz qeyd olunur".
İ.Həbibbəyli AMEA-nın Qarabağa qayıdış hərəkatına dəstəyindən söz açaraq bildirib ki, bu il Qarabağ Universitetinin keçirdikləri tədbir çərçivəsində universitetin kitabxanasına 1246 kitab hədiyyə ediblər:
"Cari ildə Naxçıvana da tədbirimiz oldu. Naxçıvan Universitetinə Akademiyamızın kitablarından ödənişsiz istifadə üçün pulsuz kart verdik. Bu yolla Universitet əməkdaşları bütün resurslarımızdan faydalana biləcəklər".
Akademik bugünkü tədbirin əhəmiyyətindən söz açaraq Azərbaycan və Türkiyənin həmişə bir-birinə dəstək göstərdiyini vurğulayıb:
"İki ölkənin həmrəyliyi zəfərlərimizdə böyük rol oynayıb. İkinci Qarabağ müharibəsində Azərbaycanın qazandığı qələbədən sonra Türk dövlətləri arasında birliyə yönələn addımlar daha sürətlə atılmağa başlandı. Türkoloji Qurultayın 2026-cı ildə Azərbaycanda keçirilməsi ölkəmizim Türk dünyasının birləşməsindəki töhfəsinin nümunəsidir. Azərbaycan qısa müdsətdə dünya liderlərinin yüksək qiymətləndirdiyi bir ölkəyə çevrildi, bu o deməkdir ki, Azərbaycan Prezidenti də dünyanın nüfuzlu liderlərindən biridir. "İki dövlət, bir millət" şüarımız artıq "Bir millət, 6-7 dövlət"ə çevrilir".
14:28 17.10.2025
Oxunuş sayı: 8667
