Füzuli şəhərində 3500 dən çox keçmiş məcbur köçkün məskunlaşıb - Deputat
Bu gün Azərbaycan xalqı üçün xüsusi əhəmiyyət daşıyan tarixi gündür Füzuli şəhər günü qeyd olunur. Qarabağın qədim və mədəniyyət beşiyi sayılan bu şəhər 2020-ci il oktyabrın 17-də – Vətən müharibəsi zamanı Azərbaycan Ordusunun qəhrəmanlığı nəticəsində Ermənistan işğalından azad edilmişdir. Məhz həmin gün illərlə düşmən tapdağı altında qalan Füzuli azad nəfəsini yenidən bərpa etdi və dövlət müstəqilliyimizin, milli qürurumuzun rəmzinə çevrildi.
Bu gün Füzuli yalnız azadlığın deyil, həm də dirçəlişin, yenidənqurmanın və gələcəyə inamın simvoludur. Şəhərdə genişmiqyaslı bərpa və tikinti işləri aparılır, yeni infrastruktur, məktəblər, yollar, yaşayış massivləri salınır. Prezident İlham Əliyevin rəhbərliyi ilə həyata keçirilən layihələr Füzulini müasir, abad və yaşıl şəhərə çevirməyi hədəfləyir.
Füzuli şəhər gününün qeyd edilməsi təkcə bir şəhərin azadlığına həsr olunmuş bayram deyil, eyni zamanda Azərbaycan xalqının milli birliyinin, iradəsinin və tarixi ədalətin bərpasının təntənəsidir. Bu gün hər bir azərbaycanlı üçün qürur, fərəh və vətən sevgisi ilə dolu bir gündür.
Tarixi gün ilə bağlı Milli Məclisin deputatı Vüqar Bayramov öz fikirlərini Crossmedia.az-a bölüşüb:
"Bu gün Füzuli şəhəri günü qeyd olunur. Prezident İlham Əliyevin 31 iyul 2023-cü il tarixli Sərəncamı ilə 17 oktyabr Füzuli şəhəri günü kimi müəyyən olub. 1827-ci ildə əsası qoyulmuş Füzuli Azərbaycan iqtisadiyyatında və xüsusi ilə kənd təsərrüfatı məhsullarının istehsalında xüsusi paya malik olan rayonlarımızdan olub. 1993-cü il Ermənistan işğalı nəticəsində rayon ərazisinin çox hissəsi tamamilə dağıdılmış və ciddi ziyan dəymişdir.
Füzuli rayonunun böyük hissəsinin işğal edilməsi nəticəsində 83 min 544 dinc sakin didərgin salındı. İşğal nəticəsində Füzuli rayonuna 4 milyard manata yaxın ziyan dəymişdir. Bütövlükdə, dövlət mülkiyyətində olmuş 22 min 635 əmlak tamamilə məhv edilmişdir. 27 illik işğala məruz qalan Füzuli azad edilmiş rayonlar arasında minaların sayına görə ən çox çirkləndirilmiş rayondur. İlkin hesablamalara görə rayonda yüz mindən çox mina basdırılıb".
Deputat həmçinin 2020-ci ilin oktyabrın 17-də işğaldan azad olunan Füzuli şəhərinin Prezident İlham Əliyevin tapşırığına əsasən yenidən qurulduğunu və infrastrukturun bərpası istiqamətində irimiqyaslı işlər həyata keçirildiyini bildirib:
"Füzuli şəhərində artıq 3500-dən çox keçmiş məcburi köçkün məskunlaşıb. Rayonun digər yaşayış məntəqələrinin bərpası istiqamətində işlər sürətlənib. Kifayət qədər böyük iqtisadi potensialı olan Füzuli rayonu Qarabağ iqtisadiyyatının formalaşmasına və re-inteqrasiyasına xüsusi töhvə verəcək. Bu Füzuli üçün yeni bir inkişaf səhifəsinin açılması deməkdir".
Elmir Heydərli
11:33 17.10.2025
Oxunuş sayı: 8709
