Şavkat Mirziyoyev MDB-nin inkişafı üçün yeni təşəbbüslər irəli sürdü
Tacikistanın paytaxtı Düşənbədə keçirilən MDB Dövlət Başçıları Şurasının iclasında Özbəkistan Prezidenti Şavkat Mirziyoyev təşkilatın çoxşaxəli əməkdaşlığının səmərəliliyini artırmaq və üzv ölkələrin iqtisadi dayanıqlığını gücləndirmək məqsədilə bir sıra mühüm təkliflərlə çıxış edib.
Crossmedia.az xarici mənbələrə əsasən xəbər verir ki, prezidentin təklifləri sırasında bütün nəqliyyat növləri ilə inteqrasiya olunmuş informasiya-logistika mərkəzlərinin yaradılması, nəqliyyat sahəsində əməkdaşlığa həsr olunmuş MDB konfransının Özbəkistanda təşkili, eləcə də xüsusi iqtisadi zonaların inkişafına dair “yol xəritəsi”nin hazırlanması və startapların təşviqi üçün MDB Vençur Platformasının yaradılması yer alır.
Mirziyoyev həmçinin Daşkənddə “INNOPROM” sərgisi çərçivəsində MDB İnnovasiya Sənaye Forumunun keçirilməsini, enerji sektorunun innovativ inkişaf proqramının hazırlanmasını və ənənəvi ilə “yaşıl” enerji sahələrində birgə layihələrin həyata keçirilməsini təklif edib.
Dövlət başçısı əməkdaşlığın genişləndirilməsi məqsədilə diplomların qarşılıqlı tanınmasına dair yeni sazişin hazırlanması, Xivə şəhərində MDB Gənclər Forumunun keçirilməsi və Gənclər İnnovasiya Laboratoriyasının yaradılması kimi təşəbbüslər də irəli sürüb.
O, həmçinin MDB ölkələrinin xarici siyasət orqanları və xüsusi xidmət qurumları arasında koordinasiyanın gücləndirilməsinin vacibliyini vurğulayıb.
Fidan Quliyeva
17:45 10.10.2025
Oxunuş sayı: 9601
