Pavel Durov: Azadlığı qorumaq üçün az vaxtımız qalıb
Bu gün Telegram messencerinin yaradıcısı və rəhbəri Pavel Durovun 41 yaşı tamam olur.
Bu barədə Crossmedia.az xarici mənbələrə istinadən xəbər verir. Lakin biznesmen ad günündə paylaşdığı yazıda qeyd edib ki, bu ili qeyd etməyə əhvalı yoxdur.
Durov öz paylaşımında yazıb: "Mənim 41 yaşım olur, lakin mən qeyd etmək əhvalında deyiləm. Bizim nəslin sərbəst interneti — atalarımızın bizim üçün yaratdığı azad məlumat mübadiləsi məkanını — xilas etməyə getdikcə az vaxtı qalır. Bir zamanlar azad informasiya mübadiləsi vədi olan internet indi tam nəzarət alətinə çevrilir. Vaxtilə azad hesab edilən ölkələr distopik tədbirlər tətbiq edir: rəqəmsal şəxsiyyət vəsiqələri (Böyük Britaniya), onlayn yaş yoxlaması (Avstraliya) və şəxsi mesajların kütləvi skan olunması (Avropa İttifaqı)".
Onun sözlərinə görə Almaniya internetdə məmurları tənqid etməyə cəsarət edənləri təqib edir: "Böyük Britaniya minlərlə insanı tvitlərinə görə həbs edir. Fransa isə azadlıq və məxfiliyi müdafiə edən texnologiya liderlərinə qarşı cinayət işi açır.
Qaranlıq, antiutopik dünya biz yatarkən sürətlə yaxınlaşır. Bizim nəslimiz tarixə azadlıqlara sahib olan, lakin onları əldən verən son nəsil kimi düşmək riski daşıyır.
Bizə yalanlar təlqin edilib. Bizə inandırıblar ki, bizim nəslin ən böyük mübarizəsi əcdadlarımızın bizə miras qoyduqlarını — ənənələri, məxfiliyi, suverenliyi, azad bazarı və söz azadlığını — məhv etməkdir.
Əcdadlarımızın mirasına xəyanət etməklə biz özünü məhvə aparan yola qədəm qoymuşuq — mənəvi, intellektual, iqtisadi və sonda bioloji baxımdan.
Buna görə də, yox, bu gün qeyd etməyəcəyəm. Mənim vaxtım tükənir. Bizim vaxtımız tükənir”.
Durovun bu paylaşımı qısa müddətdə sosial şəbəkələrdə geniş müzakirələrə səbəb olub. Bir çox istifadəçilər onun sözlərini azad internetin gələcəyi ilə bağlı xəbərdarlıq kimi qiymətləndirib.
Mehriban İbrahimli
17:09 10.10.2025
Oxunuş sayı: 990
