Kibertəhlükəsizlik məsələsi Azərbaycanda strateji prioritetlərdən birinə çevrilib- Açıqlama
Gürcüstan Müdafiə Nazirliyində Azərbaycan Kibertəhlükəsizlik Xidmətinin nümayəndələri ilə görüş keçirilib. Görüşdə kibertəhlükəsizlik sahəsində əməkdaşlıq, təcrübə mübadiləsi və birgə layihələr müzakirə olunub. Azərbaycan nümayəndə heyəti həmçinin Gürcüstan Milli Müdafiə Akademiyasını və Şindisi Memorialını ziyarət edib. Azərbaycan və Gürcüstan kibertəhlükəsizlik sahəsində əməkdaşlığı müzakirə edib.
Məlum olduğu kimi, hərbi sahədə kibertəhlükəsizlik ən mühüm istiqamətlərdəndir. Kibertəhlükəsizliyin aktuallığı və əhəmiyyəti getdikcə artır.
Hərbi ekspert Üzeyir Cəfərov Azərbaycanla Gürcüstan arasında kibertəhlükəsizlik sahəsində əməkdaşlıq Crossmedia.az-a danışıb: “Bugün Azərbaycanda keçirilən beynəlxalq tədbirdə kibertəhlükəsizlik məsələləri geniş müzakirə olunub. Tədbirdə çıxış edən General-leytenant İlqar Musayev bildirib ki, kiber cinayətlər gündən- günə aktuallaşır və artıq ölkələr üçün milli təhlükəsizlik məsələsinə çevrilib. O qeyd edib ki, bəzi ölkələr bu sahənin əhəmiyyətini tam dərk etməsə də, Azərbaycanda xüsusi Rabitə və Kiber Təhlükəsizlik Baş İdarəsi yaradılıb və burada xeyli mütəxəssis fəaliyyət göstərir, davamlı təlimlər keçir və beynəlxalq təcrübə öyrənir”.
Hərbi ekspert əlavə edib ki, bu sahəyə diqqət yetirmək artıq qaçılmazdır. O vurğulayıb ki, kibertəhlükəsizlik gələcəkdə də Azərbaycan üçün prioritet sahələrdən biri olacaq: “Gürcüstanla birgə keçirilən təlimlər, əməkdaşlıq yalnız təcrübə mübadiləsi üçün deyil, həm də maraqlı qüvvələrin mümkün xaker hücumlarına qarşı ölkəni qorumaq baxımından mühüm əhəmiyyət kəsb edir. İndi informasiya texnologiyaları dövrüdür, hər bir ölkənin, xüsusilə qonşu ölkələr arasındakı əlaqələrin təhlükəsizliyi, rəqəmsal məkanın qorunması böyük önəm daşıyır. Beləliklə, kibertəhlükəsizlik məsələsi Azərbaycanda strateji prioritetlərdən birinə çevrilib. Dövlət həm yerli mütəxəssislərin yetişdirilməsinə, həm beynəlxalq əməkdaşlığa, həm də qabaqlayıcı tədbirlərin həyata keçirilməsinə xüsusi diqqət ayırır. Bu sahədə atılan addımlar, gələcəkdə ölkənin rəqəmsal məkanının qorunması və təhlükəsizlik strategiyasının gücləndirilməsi baxımından əhəmiyyətlidir”.
Fidan Quliyeva
23:28 09.10.2025
Oxunuş sayı: 1378
