Zakir Həsənovun Türkiyəyə səfərinin detalları açıqlanıb: "Strateji əhəmiyyəti müzakirələr..." - DEPUTAT
Azərbaycanın müdafiə naziri, general-polkovnik Zakir Həsənovun Türkiyəyə rəsmi səfəri çərçivəsində türkiyəli həmkarı, milli müdafiə naziri Yaşar Gülərlə görüşündə hərbi əməkdaşlıq, regional təhlükəsizlik və sülh məsələləri müzakirə olunub.
Azərbaycanla Türkiyə arasında müxtəlif səviyyələrdə müntəzəm görüşlər olur. Bu kontekstdə müdafiə nazirlərinin intensiv görüşləri xüsusilə diqqət çəkir. Adətən belə görüşlərdə nazirlər ikitərəfli əməkdaşlığın güclənməsini, regional təhlükəsizlik məsələlərini müzakirə edirlər.
Milli Məclisin deputatı Elman Nəsirov bu dəfəki görüşün əhəmiyyəti barədə fikirlərini Crossmedia.az-la bölüşüb:
“Məlum olduğu kimi, Azərbaycan–Türkiyə münasibətləri artıq strateji müttəfiqlik səviyyəsinə yüksəlir. 2021-ci ildə imzalanmış Şuşa Bəyannaməsi ilə biz həm də hərbi müttəfiqik. Məsələyə bu kontekstdə yanaşdıqda onu da xüsusi vurğulayım ki, Qəbələdə keçirilən Türk Dövlətləri Təşkilatının (TDT) XII Zirvə Toplantısında cənab Prezident İlham Əliyev söylədi ki, bu günlərdə TDT dünyada təkcə əməkdaşlıq platforması deyil, həm də dünyanın mühüm geosiyasi mərkəzlərindən biri kimi formalaşmalıdır. Eyni zamanda vurğuladı ki, bizim türk dövlətləri arasında hərbi-müdafiə və hərbi-texniki sahədə əməkdaşlıq məsələləri çox xüsusi önəm kəsb edir. Qeyd etdi ki, keçən il 25-dən artıq Türkiyə ilə və çoxmillətli səviyyədə bizim hərbi təlimlər keçirilib. Eyni zamanda 2026-cı ildə TDT-yə üzv olan ölkələrin birgə Azərbaycanda hərbi təlimlər keçirməsi təklif edib. Hesab edirəm ki, məsələyə bu kontekstdə yanaşdıqda, Azərbaycanın müdafiə naziri, general-polkovnik Zakir Həsənovun Türkiyə səfəri və türkiyəli həmkarı Yaşar Gülərlə keçirdiyi görüşdə müzakirə olunan məsələlər haqqında ilkin proqnozlar vermək mümkündür".
"Təbii ki, bu görüşdə həm ikitərəfli formatda Azərbaycanın Türkiyə ilə hərbi əməkdaşlığının daha da genişləndirilməsi, eyni zamanda TDT çərçivəsində bu hərbi əməkdaşlığın daha da möhkəmləndirilməsi və hərbi müdafiə, hərbi-texniki əməkdaşlıq sahəsində əlaqələrin daha da səmərəli təşkili müzakirə olunur. Bu görüşlər ona yönəlir ki, TDT bu günlərdə dünyada yeni bir güc mərkəzi kimi formalaşırsa, deməli, bu güc mərkəzinin təkcə iqtisadi, siyasi, humanitar və s. aspektləri ilə yanaşı, həm də hərbi komponentləri özündə əks etdirməlidir. Azərbaycan müdafiə nazirinin Türkiyə səfəri qeyd edilən məsələnin aktuallığı baxımından olduqca önəmlidir və strateji əhəmiyyəti müzakirələrlə yadda qalacaq".
Fidan Qarayeva
16:34 09.10.2025
Oxunuş sayı: 11941
