Qəbələdə keçirilən Zirvə Toplantısı sadəcə simvolik və ya təbliğati hadisə deyil - Açıqlama
Qəbələdə keçirilən Türk Dövlətləri Təşkilatının XII Zirvə Toplantısı Türk dünyasının siyasi, iqtisadi və mədəni birliyinin möhkəmlənməsi baxımından tarixi əhəmiyyət daşıyır. Bu sammit təkcə regional əməkdaşlığın genişlənməsi deyil, həm də türk xalqlarının ortaq kimliyinin və mənəvi birliyinin təntənəsidir. Zirvə toplantısında qəbul edilən qərarlar və irəli sürülən təşəbbüslər, xüsusilə də 15 dekabr tarixinin “Dünya Türk Dilli Ailəsi Günü” kimi qeyd olunması təklifi, Türk dünyasının mədəni və mənəvi inteqrasiyasına verilən yüksək dəyərin göstəricisidir.
Bu mühüm toplantı, son illərdə Türk Dövlətləri Təşkilatının siyasi çəkisinin artdığını, təşkilatın artıq regional güc mərkəzinə çevrildiyini bir daha nümayiş etdirdi. Azərbaycanın ev sahibliyi etdiyi bu sammit həm Türk birliyinin gələcək inkişaf istiqamətlərini müəyyənləşdirdi, həm də bölgədə yeni əməkdaşlıq formatlarının formalaşmasına təkan verdi.
Məsələ ilə bağlı Crossmedia.az-a açıqlama verən Bakı Dövlət Universitetinin professoru Qulu Məhərrəmli Türk Dövlətləri Təşkilatının Qəbələdə keçirilən Zirvə Toplantısının həm region, həm türk xalqları, həm də bütövlükdə Türk dünyası üçün mühüm hadisə olduğunu qeyd edib: "Bu sammit təkcə regional deyil, eyni zamanda beynəlxalq miqyasda əhəmiyyətli bir siyasi tədbir kimi dəyərləndirilir. Burada Türkiyə Prezidenti Rəcəb Tayyib Ərdoğanın 15 dekabr tarixinin “Dünya Türk Dili Ailəsi Günü” kimi qeyd olunması təşəbbüsünü dəstəkləməsi xüsusi diqqətəlayiqdir. Bu təklifin həm mənəvi, həm də mədəni mahiyyəti var və türk dövlətlərinin mədəni birliyinin güclənməsinə yönəlmiş ciddi mesaj daşıyır.
Bu təşəbbüsün UNESCO səviyyəsində də gündəmə gətirilməsi onun beynəlxalq miqyasda tanınmasına və möhkəmlənməsinə xidmət edir. Əslində bu, təkcə mədəniyyət və ana dili məsələsi deyil, həm də Türk Dövlətləri Təşkilatının artan siyasi nüfuzunun göstəricisidir.
Son illərdə, xüsusilə Azərbaycanın Qarabağda qazandığı tarixi Zəfərdən sonra Türk Dövlətləri Təşkilatının fəaliyyəti daha konkret məzmun kəsb etməyə başlayıb. Əgər əvvəlki sammitlər daha çox təbliğati xarakter daşıyırdısa, bu gün təşkilat real regional güc mərkəzinə çevrilməkdədir. Təşkilat daxilində artıq yalnız ideoloji çağırışlar deyil, konkret əməkdaşlıq formatları formalaşır.
Bu əməkdaşlıq müxtəlif istiqamətləri əhatə edir. Ümumtürk əlifbasının və dilinin tətbiqi, ortaq iqtisadi zonanın yaradılması, elm, təhsil və mədəniyyət sahələrində birgə layihələrin həyata keçirilməsi kimi təşəbbüslər həyata keçirilir.
Azərbaycan ilə Qazaxıstan arasında son dövrdə iqtisadi, mədəni və təhsil sahələrində əməkdaşlığın dərinləşməsi bu birliyin praktik nəticələrini göstərir. Eyni zamanda, Özbəkistanda Avropa ilə əlaqələrin güclənməsi, xüsusilə təhsil və media sahəsində böyük beynəlxalq layihələrin icrası diqqətçəkicidir. Məsələn, Avrasiya Universitetinin Özbəkistan bölməsinin açılması bu istiqamətdə atılan mühüm addımlardandır.
Azərbaycanla Özbəkistan arasında da əməkdaşlıq dinamik şəkildə inkişaf edir. Bakı Dövlət Universiteti ilə Özbəkistanın Media və Kommunikasiya Universiteti arasında qurulan elmi-tədris əlaqələri bu əməkdaşlığın real nümunəsidir".
Professor həmçinin bütün bu faktların Qəbələdə keçirilən Zirvə Toplantısının sadəcə simvolik və ya təbliğati hadisə olmadığını, Türk dünyasının siyasi, iqtisadi və mədəni inteqrasiyasına xidmət edən strateji mərhələ olduğunu bildirib.
"Bu sammitin verdiyi mesajlar regional və beynəlxalq səviyyədə yeni reallığın göstəricisidir və bu reallıq mütləq şəkildə nəzərə alınmalıdır" - deyə o əlavə edib.
Elmir Heydərli
21:15 08.10.2025
Oxunuş sayı: 1271
