Dövlət siyasətinin açıq göstəricisi: Azərbaycan təhsil sahəsində dünyada ilk sıralardadadır
UNESCO-nun göstəricilərinə görə, Azərbaycanda savadlılıq səviyyəsi 100%-ə yaxındır. Bu barədə elm və təhsil nazirinin müavini İdris İsayev “Təhsildə Yeni Çağırışlar” VI Beynəlxalq Forumunda bildirib. O qeyd edib ki, ölkədə təhsil sistemi beynəlxalq standartlara uyğunlaşdırılır, rəqəmsal və “yaşıl” bacarıqların inkişafına diqqət yetirilir və süni intellekt alətlərindən tədrisdə istifadə olunur.
Azərbaycanda savadlılıq səviyyəsinin yüksək olması ölkənin insan kapitalına böyük üstünlük qazandırır. Lakin bu göstəricini qorumaq və gücləndirmək üçün təhsil sistemində müasir bacarıqların tətbiqi davamlı olmalıdır. Xüsusilə rəqəmsal və “yaşıl” sahələrdə gənclərin hazırlanması gələcək inkişaf üçün vacibdir.
Mövzu ilə bağlı Milli Məclisin deputatı Ceyhun Məmmədov Crossmedia.az-a açıqlama verib.
Deputat, gənclərdə süni intellekt bacarıqlarını formalaşdırmağın bu günün ən vacib məsələlərindən olduğunu bildirib: “Bugünkü UNESCO göstəricilərinə görə, Azərbaycanda savadlılıq səviyyəsi ən yüksək səviyyədədir. Təhsil nazirinin müavininin dediyi kimi, bu mənada Azərbaycan bir çox dövlətlərdən irəlidədir. Eyni zamanda bu gün təhsil sistemində müəyyən addımlar atılır, bacarıqlar formalaşdırılır, süni intellektin imkanlarından istifadə olunur. Təbii ki, bütün bunlar ölkə rəhbərliyi tərəfindən həyata keçirilən siyasət nəticəsində baş verir. Bu gün biz həmin siyasətin dövlətimiz tərəfindən uğurla, sistemli və ardıcıl şəkildə həyata keçirildiyinin şahidiyik. Dünyada da ciddi proseslər gedir, süni intellektə maraq daha da artır. Süni intellektdən gənclər daha çox istifadə edirlər və biz gənclərdə bu bacarıqları aşılamaq, formalaşdırmaq üçün sistemli və ardıcıl tədbirlər həyata keçirməliyik. Bu, çox vacib və xüsusi əhəmiyyət daşıyan bir məsələdir”.
“Hazırda ölkəmizdə bu siyasət uğurla davam etdirilir. Bu proses, eyni zamanda, davamlı insan kapitalının formalaşmasına da müsbət təsir göstərir. Biz bunu gənc, savadlı, bilikli nəslin yetişməsində aydın şəkildə görürük. Həmin gənclər formalaşaraq dövlətimizə və dövlətçiliyimizə öz töhfələrini verirlər, bu prosesdə fəal şəkildə iştirak edirlər. Hesab edirəm ki, bu da dövlətin həyata keçirdiyi siyasətin açıq göstəricisidir”, - parlamentari bildirib.
Nicat Rüstəmzadə
22:08 06.10.2025
Oxunuş sayı: 1158
