Azərbaycan-İtaliya əlaqələrində yeni mərhələ - Professor detalları açıqladı
Azərbaycan-İtaliya münasibətləri uzun illər ərzində inkişaf etmiş çoxşaxəli əməkdaşlıq tarixinə malikdir. Bu əlaqələr yalnız siyasi və diplomatik sahələrlə məhdudlaşmır, eyni zamanda iqtisadiyyat, maliyyə, enerji, mədəniyyət və sosial həyat sahələrində də özünü göstərir. Ölkələrimiz arasında formalaşmış əməkdaşlıq modeli qarşılıqlı hörmət, etimad və faydalı tərəfdaşlıq prinsipləri üzərində qurulub və zamanla daha da möhkəmlənir.
Azərbaycan və İtaliya xalqlarının ortaq xüsusiyyətləri, temperament, qonaqpərvərlik və əməkdaşlıq ruhu bu münasibətlərin həm dövlətlər, həm də xalqlar səviyyəsində uğurla inkişaf etməsinə töhfə verir. İki ölkə arasında iqtisadi və maliyyə layihələri, enerji sahəsində birgə təşəbbüslər və mədəni mübadilələr bu əlaqələrin məzmununu daha da zənginləşdirir.
Beləliklə, Azərbaycan-İtaliya münasibətləri həm strateji tərəfdaşlıq, həm də xalqlar arasında dostluq münasibətləri baxımından xüsusi əhəmiyyət kəsb edir.
Məsələ ilə bağlı Crossmedia.az-a açıqlama verən Milli Məclisin IV çağırış deputatı (III, IV, V,VI), iqtisad elmləri doktoru, professor Rüfət Quliyev Azərbaycan ilə İtaliya arasında çox dərin siyasi, iqtisadi, maliyyə və mədəniyyət münasibətlərimizin olduğunu qeyd edib :
"Azərbaycan-İtaliya münasibətlərindən danışarkən qeyd etmək lazımdır ki, bizim İtaliya ilə çox dərin siyasi, iqtisadi, maliyyə və mədəniyyət münasibətlərimiz var. Hətta onu deyərdim ki, İtaliya xalqı ilə Azərbaycan xalqının bir çox xüsusiyyətlərindən, temperament, qonaqpərvərlik, oxşarlıqlar mövcuddur.
Bəli, ilk öncə, bu, bizim bir nömrəli ticarət tərəfdaşımızdır və bu bir il deyil, artıq son on ildən çoxdur ki, belə münasibətlərimiz yaranıb, qorunub və inkişaf edir. Bundan başqa, bizim bir çox maliyyə layihələrimiz var. Azərbaycan çox fəal formada İtaliya ilə bir sıra maliyyə layihələri həyata keçirir".
Professor həmçinin İtaliya ilə ölkəmiz arasında olan energetika və ümumən hər iki hökümət arasında olan əlaqələrin geniş olduğunu və bunun hər iki tərəfə ciddi üstünlük qazandırdığını bildirib.
"Bu layihələrə energetika sahəsində olan geniş əlaqələri və ən əsası İtaliya höküməti ilə Azərbaycan höküməti arasında olan geniş əlaqələri qeyd etmək olar. Onların Azərbaycana səfəri və Prezidentlə görüşləri təbii ki, iki xalq, iki dövlət münasibətlərinin ən parlaq təzahürüdür. Biz bu münasibətləri inkişaf etdirəcəyik. Biz həmişə İtaliyanın bizə müsbət münasibətini, onlar da bizim onlara müsbət münasibətimizi hiss etmişik.
Bizim üçün İtaliyanın nəhəng şirkətləri ilə işləmək olduqca əhəmiyyətli və maraqlıdır. Orada çoxlu imkanlar var, enerji məsələlərindən başqa, digər sahələrdə biz üstünlükləri qeyd edə bilərik"- deyə professor qeyd edib.
Elmir Heydərli
17:32 01.10.2025
Oxunuş sayı: 6245
