Ulu Öndər Heydər Əliyevin dediyi kimi, Azərbaycan nə qədər inkişaf etsə, qüdrətli olsa da, biz heç vaxt şəhidlərimizi unutmayacağıq - Komitə sədri
Bu gün biz tariximizin şərəfli səhifələrindən birini xatırlamaq üçün bir araya gəlmişik. 27 sentyabr yalnız bir tarix deyil, həm də qəhrəmanlıq, iradə və vətənpərvərlik simvoludur. Bu gün biz təkcə torpaqlarımızın azadlığı uğrunda canlarını fəda edən şəhidlərimizi anmır, həm də böyük zəfərin başlanğıcını, müstəqil Azərbaycanın gücünü və xalqımızın birlik ruhunu yad edirik.
Hər bir xalqın tarixi öz qəhrəmanları ilə ölçülür, onların şücaəti gələcək nəsillərə örnək olur. Bizim tariximizdə isə 27 sentyabr həm də bir dönüm nöqtəsidir. Bu gün Azərbaycan ordusunun cəsur igidləri düşmənin növbəti təxribatının qarşısını alaraq 44 günlük Vətən müharibəsinin ilk günündə döyüş meydanına atıldılar. Hər addımı, hər zəfəri ilə bu igidlər bizə göstərdi ki, vətən sevgisi yalnız söz deyil, həm də əməl və fədakarlıqdır.
Bu gün biz həm də birliyimizi, milli həmrəyliyimizi və Azərbaycanın ərazi bütövlüyünü qorumaq uğrunda xalqımızın əzm və iradəsini xatırlayırıq. 27 sentyabr təkcə tarixdə qalan bir gün deyil, həm də gələcək zəfərlərin, uğurların və milli qürurumuzun simvoludur. Biz bu günü xatırlayarkən, şəhidlərimizin qəhrəmanlığına dərin ehtiramımızı bildirir, qazilərimizin vətən uğrunda göstərdiyi şücaətə təşəkkürümüzü çatdırırıq.
Anım günü ilə əlaqədar olaraq Crossmedia.az-a açıqlama verən Milli Məclisin Əmək və sosial siyasət komitəsinin sədri Musa Quliyev 27 sentyabr tarixinin müstəqil Azərbaycanın tarixində şərəfli günlərdən biri olduğunu qeyd edib:
"Bu gün bizim məhz böyük zəfərə gedən 44 günümüzün ilk günüdür. Bizim qəhrəman şəhidlərimizin, qəhrəman qazilərimizin, qəhrəman hərbçilərimizin döyüşə atıldığı ilk gündür. Məhz 2020-ci ilin 27 sentyabrında düşmənin növbəti təxribatının qarşısını alan cəsur Azərbaycan igidləri, qalib Baş Komandanın əmri ilə döyüşə başladılar və işğalı aradan qaldırmaqla ərazi bütövlüyümüzü və suverenliyimizi tam təmin etmək üçün düşmənlə həll edici savaşa girdilər. Bu gün həm də ona görə şərəflidir ki, 44 günün hər günü biz irəliləyiş qazandıq, müsbət xəbərlər eşitdik.
Qalib Baş Komandanın tapşırığına əsasən, hər gün demək olar ki, qəhrəman ordumuz zəfərlər qazandı. Kəndlərimiz, qəsəbələrimiz, şəhərlərimiz azad oldu və biz 30 il ərzində əsarət altında olan torpaqlarımıza qayıtmaq imkanını əldə etdik. Əlbəttə, bu günün anım günü qeyd olunması həm də 44 günlük Vətən müharibəsində, ondan əvvəl və ondan sonra vətən torpağı uğrunda, ərazi bütövlüyümüz uğrunda, Azərbaycanın dövlət müstəqilliyinin qorunması uğrunda şəhid olan qəhrəman əsgərlərimizin xatirəsinin əbədiləşdirilməsi günüdür.
Heç şübhəsiz ki, biz şəhidlərimizə və qazilərimizə həmişə böyük ehtiram və hörmət göstəririk. Onların xatirəsi hər gün xalqımız üçün əzizdir. Amma belə bir günün simvolik olaraq qəbul olunması, onların xatirəsinə xüsusi hörmətin ifadəsidir.
Bu gün bizi bir daha birləşdirir, bir daha əmr edir, bir daha vətən torpağının nə qədər əziz olduğunu bizə göstərir. Hər il biz bu günü həm Bakıda, həm digər şəhər və rayonlarımızda şəhidlərin xəyabanlarını ziyarət edərək, onlara öz ehtiram və hörmət borcumuzu bildiririk. Bu da millətimizin birliyinin və böyüklüyünün ifadəsidir.
Bu gün həm də bizi gələcək böyük zəfərlərə aparan günün başlanğıcı kimi əhəmiyyətlidir. 2020-ci ilin 27 sentyabrından sonra yalnız Azərbaycanın deyil, bölgənin geosiyasi vəziyyəti də dəyişdi, siyasi mühit yeniləndi və Azərbaycan qalib bir dövlət kimi, lider bir dövlət kimi təkcə bölgədə deyil, dünyada da tanındı və xüsusi hörmət sahibi oldu.
Bu günlərdə BMT Baş Assambleyasında Amerika Birləşmiş Ştatlarının Prezidenti Donald Trampın dövlət başçımıza qarşı göstərdiyi böyük hörməti müşahidə etdik. Bu həm Azərbaycana qarşı hörmətdir, həm də xatirəsini andığımız qəhrəman şəhidlərə xüsusi ehtiramdır. 8 avqustda biz bunu bir daha gördük: dünyanın demək olar ki, ən güclü və nüfuzlu dövlətinin baş ofisində, cənab Prezident İlham Əliyev əsl sərkərdə və əsl qəhrəman kimi qarşılandı.
Bütün bunlar uzun illər ərzində cənab Ali Baş Komandanın rəhbərliyi altında aparılan ordu quruculuğu siyasətinin nəticəsidir. Bu siyasət sayəsində biz bütün məqsədlərimizə çatdıq və bundan sonra da çatacağıq.
Deputat, həmçinin bölgəyə böyük sülhün gələcəyini, tərəqqinin inkişaf edəcəyini, əməkdaşlığın artacağını, kommunikasiyaların açılacağını, o cümlədən Zəngəzur dəhlizinin fəaliyyətə başlayacağını qeyd edib:
"Azərbaycan, Ulu Öndər Heydər Əliyevin dediyi kimi, günəş kimi doğacaq. Azərbaycan nə qədər inkişaf etsə, qüdrətli olsa da, xalqının sayı artarsa da, biz heç vaxt şəhidlərimizi unutmayacağıq. Bu, dövlətçilik əxlaqıdır, millətimizin şəhidlərinə olan hörmətinin ifadəsidir"-deyə o bildirib.
Elmir Heydərli
10:21 28.09.2025
Oxunuş sayı: 4059
